دانیشتنی دادگای فیدراڵی لەسەر سکاڵاکەی یەکێتی دواخرا

PUKMEDIA

بینای دادگای فیدراڵی عیراق

دادگای فیدراڵی بۆ جارێکی دیکە دانیشتنی لەبارەی سکاڵایەکی یاکێتیی نیشتمانیی کوردستان کە تایبەت بوو بە یاسای هەڵبژاردنی پەرلەمانی کوردستان دواخست.

بڕیاربوو ئەمڕۆ یەکشەممە 19ی 11 دانیشتی دادگای فیدراڵی عیراق لەبارەی سکاڵایەکی یەکێتیەوە بەڕێوەبچێت، کە سکاڵاکەی یەکێتی لەلایەن زیاد جەبار سەرۆكی فراكسیۆنەكەی لە خولی پێنجەمی پەرلەمانی كوردستان لەسەر ماددەكانی (1-9-15-22-36)ی یاسای هەڵبژاردنەكانی پەرلەمانی كوردستان تۆماركرابوو، بەڵام دادگا بڕیاریدا دانیشتناکە دوابخات.

یەکێتی لەرێگەی ئەم سكاڵایەوە دەیەوێت بۆ هەڵبژاردنی 25ی شوباتی داهاتووی پەرلەمانی كوردستان، كار بە یاسای ئەنجومەنی نیشتمانی كوردستانی عیراق بكرێت، كە ساڵی 1992 لەلایەن بەرەی كوردستانییەوە دەركراوە.

ئەگەر دادگا سكاڵاكە لەبەرژەوەندی یەكێتی یەکلایی بکاتەوە، ئەوە دەبێت دادوەرەكان سەرپەرشتی پرۆسەی هەڵبژاردنەکەی هەرێم بكەن لەبری كۆمسیۆنی هەڵبژاردنەكانی عیراق، هەروەها (11) كورسی "كۆتا"ی پێكهاتەكانیش هەڵدەوەشێتەوە‌و تەنیا (5) كورسی "كۆتا" بۆ مەسیحییەكان دەمێنێتەوە.

هەروەها بەپێی یاسای ئەنجومەنی نیشتمانی، شێوازی هەڵبژاردنی كوردستان لە یەك بازنەییەوە دەگۆڕێت بۆ چوار بازنەی هەڵبژاردن.

PUKMEDIA