دادگای فیدراڵی :مەرسومی سەرۆككۆمار بۆ كاردیناڵ لویس ساكۆ دروستە

PUKMEDIA

دادگای باڵای فیدراڵی عیراق

دادگای باڵای فیدراڵی عیراق سکاڵای یاسایی کاردیناڵ لویس ساکۆی لەدژی دەرکردنی مەرسومی کۆماری ژمارە ٣١ی سەرۆکایەتی کۆماری عیراق رەتکردەوە و رایگەیاند:"رێکارەکانی دەرکردنی مەرسومەکەی سەرۆككۆمار دروستە".

لە بەیاننامەیەکدا کە کۆپییەکی دەست PUKMEDIA کەوتووە دادگای فیدراڵی دووپاتیکردووەتەوە:" دادگای باڵای فیدراڵی بڕیاریدا بەڕەتکردنەوەی داوای سکاڵاکار مارلویس رۆفائیلی یەکەم ساکۆ پاتریارکی بابل بۆ کلدانەکانی عیراق و جیهان، لەبەرنەبوونی هیچ بەڵگەیەک کە پێچەوانەی راستی و دروستی ئەو رێکارانە بێت، کە مەرسومی کۆماری ژمارە ٣١ی ساڵی ٢٠٠٣ی بۆ دەرچووە و لە رۆژنامەی وەقایعی عیراقی ژمارە ٤٧٢٧ لە ٣-٧-٢٠٢٣ بڵاوکراوەتەوە. 

ئەمە لەکاتێکدایە رۆژی ٧-٧-٢٠٢٣ د.لەتیف رەشید سەرۆککۆماری عیراق لە روونکردنەوەیەکدا رایگەیاند:" هەڵوەشاندنەوەی مەرسومی کۆماری ژمارە ١٤٧ی ساڵی ٢٠١٣ هیچ زیانێک بەدۆخی ئاینی و یاسایی کاردیناڵ لویس ساکۆ ناگەیەنێت، چونکە لەلایەن پاپاوە وەک پاتریارکی کەنیسەی کلدانی لەعیراق و جیهان دەستنیشانکراوە، بۆیە هەڵوەشاندنەوەی ئەو مەرسومە بۆ راستکردنەوەی دۆخێکی دەستوری بووە کە بەبێ هیچ پاڵپشتییەکی دەستوری و یاسایی دەرچووە.

دووپاتیشیکردەوە:" پاتریارک لویس ساکۆ کەسایەتییەکی پایەبەرز و رێزلێگیراوی سەرۆکایەتی کۆماری عیراقە،چونکە ئەو پاتریارکی کەنیسەی کلدانییە لەعیراق و جیهان. 

PUKMEDIA