riklam

سەرۆککۆمار چەند پرۆژەیەک بەسەردەکاتەوە

عیراق 08:12 PM - 2023-11-13
دیمەنی سەردانەکەی سەرۆککۆمار نوسینگەی رۆژنامەوانی سەرۆککۆمار

دیمەنی سەردانەکەی سەرۆککۆمار

سەرۆککۆمار

دکتۆر لەتیف جەمال رەشید سەرۆک کۆمار سەردانی ناوچەی جازانی کرد لە شانشینی عەرەبی سعودیە و ژمارەیەک پرۆژەی بەسەرکردەوە.

 

ئەمڕۆ دووشەممە 13-11-2023، سەرۆک کۆمار بەیاوەری بەڕێزان د.فوئاد حسێن جێگری سەرۆک وەزیران و وەزیری دەرەوە و خاتوو سەفیە سوهێل باڵیۆزی عیراق لە سعودیە و ماجد قەسبی وەزیری بازرگانیی سعودیە و عەبدولعەزیز شمری باڵیۆزی سعودیە لە عیراق، سەردانی ناوچەی جازانی لە عەرەبستانی سعودیە کرد.

 

لەگەڵ گەیشتنی سەرۆک کۆمار بۆ فڕۆکەخانەی نێودەوڵەتیی شا عەبدوڵڵا لە شاری جازان، لەلایەن شازادە محەمەد بن ناسر بن عەبدولعەزیز ئال سعود میری ناوچەی جازان  پێشوازی لێکرا و رێوڕەسمێک لە سەنتەری توێژینەوەی کشتوکاڵی لە جازان بەڕێوەچوو، کە تێیدا پێشوازی لە سەرۆک کۆمار کرا، هەروەها فیلمێکی دۆکیومێنتاری لەسەر قۆناغەکانی دروستکردنی بەنداوی جازان نمایشکرا.

 

هەروەک میری ناوچەی جازان دیارییەکی پێشکەش بە سەرۆک کۆمار کرد، کە بریتیبوو لە دوو توێی راپۆرتێک، کە لەلایەن سەرۆکەوە لە ساڵی 1984 نوسراوە، کاتێک ئەندازیارێکی نیشتەجێ و بەڕێوەبەری پڕۆژەی دۆڵی جازان بوە بۆ دروستکردنی بەنداو و دامەزراوەکان و وەبەرهێنانی زەوییە کشتوکاڵییەکان و بەڕێوەبردنی ئاو.

 

هاوکات سەرۆک کۆمار لەگەڵ ژمارەیەک لە هاوڕێ و هاوکارەکانی کۆبوەوە، کە زیاتر لە ٣٠ ساڵ لەمەوبەر لە بەنداوی دۆڵی جازان لەگەڵیدا کاریان کردبوو، خۆشحاڵی خۆی دەربڕی بە بینینی هاوڕێکانی و لەگەڵ ناردنی سڵاوی بۆ خانەوادەکانیان.

 

لەم چوارچێوەیەشدا بەڕێزیان بایەخی سودوەرگرتنی لە ئەزمونەکان و گۆڕینەوەی پسپۆڕییەکان لەنێوان عیراق و سعودیە دوپاتکردەوە، کە بە سود بۆ هەردوو گەلی برا دەگەڕێتەوە.

 

لە پەراوێزی سەردانەکەیدا بۆ ناوچەی جازان، سەرۆک کۆمار پێشوازی لە ژمارەیەک سەرۆک خێڵ و بەرپرسان کرد. لە سەرەتای دیدارەکەدا شازادە محەمەد بن ناسڕ میری ناوچەی جازان، پێشوازی لە سەرۆک کۆمار کرد و ئاماژەی بەوە کرد کە بەڕێزیان پێشتر وەک ئەندازیارێک لەو ناوچەیەدا لە بەنداوی دۆڵی جازان کاری کردووە و خزمەتگوزاری بەرچاوی پێشکەشکردوە، کە بونەتەهۆی پێشخستن و پێشکەوتنی و ئەمڕۆش وەک سەرۆک کۆماری عیراق پێشوازی لێ دەکەن.

 

لەلایەن خۆیەوە سەرۆک کۆمار سوپاس و پێزانینی بۆ خەڵکی ناوچەکە دەربڕی بۆ هەست و سۆزیان و بۆ ئەو پێشوازییە گەرمەیان و ستایشی ئەو پێشکەوتنانەی کرد، کە ناوچەی جازان بەدەستیهێناوە و لەگەڵ پێشکەوتنەکانی جیهاندا هاوتەریبە و هیوای پێشکەوتن و بەرەوپێشچوونی بەردەوامی بۆ خواستن.

 

پاشان بەڕێزیان سەردانی ناوەندی شارستانیی شازادە سوڵتانی کرد، کە بە یەکێک لە ناوەندە خزمەتگوزارییە گرنگەکان دادەنرێت بۆ ئەنجامدانی چالاکییە ڕۆشنبیری و ئەدەبیەکان.

 

سەرۆک کۆمار گوێبیستی بابەتێک بوو سەبارەت بە ناوەندەکە و چالاکییەکانی و رۆڵی لە ئامێزگرتنی چالاکییە فیکریەکان. هەروەها کورتەیەک دەربارەی ناوچەی جازان و پڕۆژەکانی گەشەپێدان و وەبەرهێنان، جگە لە شوێنی جوگرافی و تایبەتمەندییە کەشوهەواییەکانی بەرهەمە کشتوکاڵییەکانی و پڕۆژەکانی ئاودێری و بەنداوەکانی ناوچەکە خرایەڕوو.

 

PUKMEDIA

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket