وه‌فدی باڵای یه‌كێتی و پارتی كۆده‌بنه‌وه‌

PUKMEDIA

کۆبوونەوەی هەردوو وەفدی باڵای یەکێتی و پارتی

کەمێک پێش ئێستا وەفدی باڵای یەکێتیی نیشتمانی کوردستان بۆ کۆبوونەوە لەگەڵ پارتی دیموکراتی کوردستان گەیشتە پیرمام، کە وەفدە باڵاکەی یەکێتیی نیشتمانیی کوردستان لەلایەن نێچیرڤان بارزانی و مەسرور بارزانی جێگرانی سەرۆکی پارتی دیموکراتی کوردستان پێشوازییان لێکرا.

وەفدە باڵاکەی یەکێتیی نیشتمانیی کوردستان کە بەسەرۆکایەتی بافڵ جەلال تاڵەبانی سەرۆکی یەکێتیی نیشتمانیی کوردستانە پێکهاتوون لە قوباد تاڵەبانی و خەسرەو گوڵ محەمەد و دەرباز کۆسرەت رەسوڵ و رەفعەت عەبدوڵڵا و شاڵاو عەلی عەسکەری و عیماد ئەحمەد و سەعدی ئەحمەد پیرە، هەروەها وەفدە باڵاکەی پارتیش پێکهاتبوون لە نێچیرڤان بارزانی و مەسرور بارزانی و فازڵ میرانی و هۆشیار زێباری و مەحمود محەمەد و ئازاد بەرواری و جەعفەر ئیمینکی و پشتیوان سادق و دڵشاد شەهاب.

پێشتر سەعدی ئەحمەد پیرە وتەبێژی یەکێتیی نیشتمانیی کوردستان لە لێدوانێکی تایبەتدا بە سایتی رەسمیی یەکێتیی نیشتمانیی کوردستان PUKMEDIA ی راگەیاندبوو:" یەکێتیی نیشتمانیی کوردستان و پارتی دیموکراتی کوردستان لەسەر ئاستی باڵا لەپیرمام کۆدەبنەوە".

"لە کۆبوونەوەکەدا چەند بابەتێکی گرنگ تایبەت بە پەیوەندییەکانی نێوان هەردوولا و بارودۆخی ئێستای هەرێم و عیراق و ناوچەکە و بودجە و هەڵبژاردنەکانی هەرێم گفتوگۆی لەبارەوە دەکرێت"، سەعدی ئەحمەد پیرە وایوت.

له‌دوای به‌ستنی پێنجه‌مین كۆنگره‌ی یه‌كێتیی نیشتمانیی كوردستان و له‌یه‌كه‌م دانیشتنی ئه‌نجومه‌نی سه‌ركردایه‌تیدا، بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان رایگه‌یاند:" له‌گه‌ڵ لایه‌نه‌كان په‌ڕ‌ه‌یه‌كی نوێ بۆ خزمه‌تی خه‌ڵك هه‌ڵده‌ده‌ینه‌وه‌ و له‌وچوارچێوه‌یه‌شدا ده‌ستپێشخه‌ری یه‌كێتیی نیشتمانیی كوردستانی بۆ سه‌ردانی لایه‌نه‌كان راگه‌یاند و به‌پێی زانیارییه‌كانی PUKMEDIA یه‌كه‌م كۆبوونه‌وه‌ی یه‌كێتی له‌گه‌ڵ پارتی ده‌بێت و پاشانیش له‌گه‌ڵ لایه‌نه‌كانی دیكه‌ كۆده‌بێته‌وه‌.