هاوپەیمانی كەركوك هێز و ئیرادەمانە: هاوپەیمانییەكەمان زامنی هیمەتی خزمەتە

PUKMEDIA

هاوپەیمانی کەرکوک هێزی و ئیرادەمانە

لە پەیامی ئەمڕۆی لیستی 142ی هاوپەیمانی كەركوك هێزی و ئیرادەمانە رایدەگەیەنێت: "هاوپەیمانییەكەمان هێزی ئەژنۆ و زامنی هیمەتی خزمەتە، بۆ ئاوەدانی و گێڕانەوەی شارەكەمانە بۆ زەمەنی زێڕینی حوكمڕانی كورد و یەكێتی و پێكەوەژیان لە كەركوكدا".

دەقی پەیامەكە:

پەیامی ئەمڕۆی هاوپەیمانی كەركوك هێز و ئیرادەمانە 

هاوپەیمانی هێز و ئیرادە، هاوپەیمانییە بۆ خزمەتی ئاوەدانی و بوژاندنەوەی كەركوك، هەر هاوپەیمانییەكی سیاسی نییە بۆ چنینەوەی دەسكەوتی سیاسی كە ئەمەش بۆ كەركوك و كورد و كوردستان زەرورییە، بەڵكو هاوپەیمانییەكە بۆ خزمەتی گەڕەكە هەژارەكان، بوژاندنەوەی باخچەی منداڵان و (مەتكەب) و بنكەی تەندروستی و خەستەخانە و شارەوانی و گوزەر و كۆڵانەكانی كەركوك.

هاوپەیمانییەكەمان  ئەندازیار و دكتۆر و مامۆستا و كارمەند و فەرمانبەر و پێشمەرگەی خزمەتی تێدایە كە لەیەكەم رۆژی دوای دەستبەكاربوونی ئەجیندای پڕۆژە و كارەكانی ئامادەیە و لیستی نوقسانییەكانی ئیدارەی بەوەكالەتی ئەزبەر كردووە، چونكە هەڵقوڵاوی داخوازی و پێداویستییەكانی خەڵكی شارەكەیە، هاوپەیمانی قەرەبووی چەند ساڵی رابردووی بێ خزمەتی گەڕەكە كوردییەكانە كە دوای ١٦ ئۆكتۆبەری ٢٠١٧ باجی سیاسەتی شۆڤێنی و تایفی لەلایەك و سیاسەتی بوغرایی و خۆ گیڤكردنی سەردەمی ریفراندۆم لە لایەكی ترەوە دەدەن.

هاوپەیمانی كەركوك هێز و ئیرادەمانە هاوپەیمانی هێزی ئەژنۆ و زامنی هیمەتی خزمەتیشە، بۆ ئاوەدانی و گێڕانەوەی شارەكەمانە بۆ زەمەنی زێڕینی حوكمڕانی كورد و یەكێتی و پێكەوەژیان لە كەركوكدا.

PUKMEDIA