وەستا ر‌ەسوڵ: لە 16ی ئۆكتۆبەردا یەكێتی شەڕی سێ دەوڵەتی كرد

PUKMEDIA

وەستا رەسوڵ ئەندامی سەركردایەتی یەكێتیی نیشتمانیی كوردستان

ئەندامێكی سەركردایەتی یەكێتیی نیشتمانیی كوردستان رایدەگەیەنێت: "لە 16ی ئۆكتۆبەردا ئێمە شەڕ‌ی سێ دەوڵەتمان دەكرد، ئێمە بەشەڕ‌ شكاین، هەندێك هێزی تریش قوچاندیان".

وەستا رەسوڵ ئەندامی سەركردایەتی یەكێتیی نیشتمانیی كوردستان و لێپرسراوی پێشووی هێزەكانی میحوەری چواری كەركوك لەشەش ساڵەی شەهیدانی 16ی ئۆكتۆبەردا لە كۆنگرەیەكی رۆژنامەوانیدا رایگەیاند: "لە 16ی ئۆكتۆبەردا دەوڵەتانی عیراق و توركیا و ئێران لەدژمان شەڕ‌یان دەكرد".

"ئێمە لە 16ی ئۆكتۆبەردا شەڕ‌ی سێ دەوڵەتمان دەكرد، بەشێوەیەك عیراق سوپاكەی پڕ‌كردبوو لە چەك و هێز لە دژمان، چونكە شەڕ‌ەكە عیراق بە تەنها نەیكرد، بەڵكو شەڕ‌ی عیراق و ئێران و توركیا بوو لە دژمان، فەرماندەی هەرسێ وڵاتەكە لەناو خورماتوو جڵەوی شەڕ‌ەكەیان دەكرد" وەستا رەسوڵ وادەڵێت.

وتیشی: "لە 16ی ئۆكتۆبەردا ئێمە بەشەڕ‌ شكاین، پارتیش بەهەڵهاتن شوێنەكانیان رادەستی سوپا و حەشدی شەعبی كرد، ئەوەش ئەو جیاوازییەیە كە پێویستە خەڵكی هەرێمی كوردستان بزانن كە كێ شەڕی كرد و شەهیدی داو كێش هەڵهات".

ئەمڕۆ شەش ساڵ بەسەر رووداوەكانی 16ی ئۆكتۆبەردا تێدەپەڕێت، كە حەشدی شەعبی و سوپای عیراق بەپیلانی ناوخۆیی و دەرەكی هێرشیان كردە سەر هێزەكانی پێشمەرگە لە ناوچەی بەشیر و دوای چەند سەعاتێك بەرگریی، 38 پێشمەرگەی یەكێتیی نیشتمانیی كوردستان شەهیدبوون و 104 پێشمەرگەی دیكەش بریندار بوون.

PUKMEDIA