قوباد تاڵەبانی: پێویستە چارەسەر بۆ بەربەستەکانی جێبەجێکردنی یاسای بودجە بدۆزرێتەوە

PUKMEDIA

قوباد تاڵەبانی و باڵیۆزی بریتانیا لە عیراق

قوباد تاڵەبانی، جێگری سەرۆک وەزیران پێشوازیکرد لە ستیفن هیچن، باڵیۆزی بریتانیا لە عیراق و لە کۆبوونەوەی نیوانیاندا کۆمەڵێک پرسی جێی بایەخی هەردوولا تاوتوێ کران.

لە بەشێکی کۆبوونەوەکەدا کە رۆژی ١٠ی ئۆکتۆبەری ٢٠٢٣ بەڕێوەچوو، باسی پەیوەندییەکانی نێوان هەرێمی کوردستان و بەغدا کرا.  لەمبارەیەوە قوباد تاڵەبانی رایگەیاند: "لەم قۆناغەدا ئەولەوییەتی ئێمە دابینکردنی بودجە و موچەی فەرمانبەرانی هەرێمە و پێویستە چارەسەرێکی خێرا بۆ بەربەست و گرفتەکانی بەردەم جێبەجێکردنی یاسای بودجە بدۆزرێتەوە".

جێگری سەرۆک وەزیران جەختیشی کردەوە: "لە سەرەتادا دەبێت لایەنە کوردستانییەکان لەسەر بەرنامە و پلانێکی هاوبەش رێکبکەون تا بە یەکدەنگی و یەکڕیزی لە بەغدا داکۆکی لە مافە دەستورییەکانی هەرێمی کوردستان بکەن. وتیشی: "رێککەوتنی کورتخایەن چارەسەر نییە، بەڵکو چارەسەری راستەقینە بۆ سەرجەم کێشە هەڵپەسێردراوەکان بریتییە لە رێککەوتنێکی درێژخایەن لەسەر بنەمای دەستور، کە ئەمەش بەبێ یەکدەنگی و یەکڕیزی لایەنە کوردستانییەکان بەدی نایەت".

لە تەوەرێکی دیکەی کۆبوونەوەکەدا باسی هەڵبژاردنەکانی داهاتووی پەرلەمانی کوردستان کرا، لەمبارەیەشەوە قوباد تاڵەبانی جەختی کردەوە لەسەر گرنگی بەڕێوەچوونی هەڵبژاردنێکی پاک و بێگەرد لەو وادەیەی کە لەلایەن سەرۆکایەتی هەرێمەوە دیاری کراوە.
PUKMEDIA