یەكێتی داوای هاوتاكردنی ئیمتیازاتی زیندانیانی سیاسی هەرێم لەگەڵ عیراق دەكات

PUKMEDIA

ئەنجومەنی نوێنەران، لۆگۆی یەكێتی، دراوی عیراقی

پەرلەمانتارێكی یەكێتی لە بەغدا داوا لە سەرۆكایەتی ئەنجومەنی نوێنەران و سەرۆكوەزیرانی عیراق دەكات، كە ماف و ئیمتیازاتی زیندانیانی سیاسی هەرێم هاوشێوەی عیراقی لێبكرێت.

چرۆ حەمەشەریف ئەندامی ئەنجومەنی نوێنەرانی عیراق لە فراكسیۆنی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA ی رایگەیاند: "داوام لە سەرۆكایەتی ئەنجومەنی نوێنەران و سەرۆكوەزیرانی عیراق كردووە، كە ماف و ئیمتیازاتی زیندانیانی سیاسی لە هەرێمی كوردستان هاوشێوەی ماف و ئیمتیازاتی زیندانیانی سیاسی عیراق لێبكرێت".

"لە داواكارییەكەمدا كە ئیمزای 80 پەرلەمانتارم بۆ كۆكردووەتەوە ئەوەشم خستووەتەڕوو، كە پێویستە مووچەی زیندانیانی سیاسی بخرێتە سەر حكومەتی عیراق، چونكە زیندانیانی سیاسی هەرێمیش هاوشێوەی زیندانیانی سیاسی عیراق بۆ دیموكراسی عیراق هەوڵیانداوە و یەك ئامانجیان هەبووە" چرۆ حەمەشەریف وادەڵێت.

راشیگەیاند: "سەرجەم فراكسیۆنە كوردستانییەكان بێ جیاوازی و بەشێكیش لە پەرلەمانتارە عەرەبەكان پشتگیری داواكارییەكەیان كردووم و هەوڵی بەردەوامیش دەدەم بۆ ئەوەی ئەو ماف و ئیمتیازاتانە بۆ زیندانیانی سیاسی هەرێم بگەڕێنمەوە".

PUKMEDIA