پارێزەرێكی زیندانیانی بادینان: پاشەكشێی ئازادی هەڕەشەیە بۆ هەرێم

PUKMEDIA

بەندینخانە

رێكخراوی لێبوردنی نێودەوڵەتی لە نوێترین راپۆرتیدا لەبارەی ئازادی مافی مرۆڤ و ئازادی رادەربڕین، لەهەرێمی كوردستان، ئاماژە بەوە دەكات: "ئازادییەكان لەپاشەكشێی بەردەوامدایە و رۆژنامەنوسان و چالاكوانان بە بیانووی جیاجیا زیندانی دەكرێن"، پارێزەرێكی تیمی پارێزەرانی زیندانیانی بادینانیش دەڵێت: "لە چوار ساڵی رابردوودا بەراورد بە پێشتر، لەدەڤەری زەرد ئازادییەكان سنووردار كراون و لە پاشەكشێدان و بووەتە هەڕەشەیەك بۆ سەر هەرێم".

لەبارەی دادگایی كردنەوەی گوهدار زیباری رێكخراوی لێبوردنی نێودەوڵەتی راگەیەندراوێك بڵاودەكاتەوەو تێدا رایدەگەیەنێت: "پێویستە حكومەتی هەرێمی كوردستان كۆتایی بە دەستگیركردن و زیندانیكردنی ڕۆژنامەوانان، چالاكوانانی بادینان و ئەوانەی ڕەخنە لە حكومەت دەگرن بهێنێت".

زیندانییەكان بوونەتە جێی رۆژنامەنوسان

لەو بارەیەشەوە رێڤینگ یاسین پارێزەری زیندانیانی بادینان لە لێدوانێكی تایبەتدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "راپۆرتەكانی رێكخراوی لێبوردنی نێودەوڵەتی لەبارەی پاشەكشێی ئازادی رادەربڕین لەهەرێمی كوردستان تەواو دروستن و لە كابینەی نۆدا ئازادییەكانی مافی مرۆڤ و رادەربڕێن تەواو لە پاشەكشێدان و زیندانەكان لەدەڤەری زەرد بوەتە جێی رۆژنامەنوسان و چالاكوانان".

"داواكارین حكومەتی هەرێم لەوە زیاتر رووی هەرێمی كوردستان لەدەرەوە و ناوەوە ناشرینتر نەكات و كۆتایی بەم رەشبگیرییەی رۆژنامەنوسان و چالاكوانان لەدەڤەری بادینان بهێنێت، رێگە نەدات هەر كەسێك وەك پارتی بیرینەكردەوە یان هەر رۆژنامەنوس و چالاكوانێك دژی گەندەڵی بێت دەستگیربكرێت"، رێڤینگ یاسین وای وت.

هەرێم كۆتایی بەدەستگیركردنی رۆژنامەنوسان بهێنێت

رێكخراوی لێبوردنی نێودەوڵەتی لە راگەیەندراوێكدا كە كۆپییەكی دەست PUKMEDIA كەوتوە رایگەیاندووە: "رۆژنامەنووس گوهدار زێباری بۆ جاری سێیەم لە دادگای تاوانی هەولێر دادگایی كرایەوە، 6 مانگی دیكەش خرایە سەر سێ ساڵ زیندانیبوونەكەی و بەگوێرەی بڕیارە نوێیەكە، پێشبینی ئەوە دەكرێت لە 16ی شوباتی 2024 ئازاد بكرێت".

 
ئاماژە بەوەشكراوە: "پێویستە حكومەتی هەرێمی كوردستان كۆتایی بە دەستگیركردنی ڕۆژنامەنوسان، چالاكوانان و ئەوانەی ڕەخنە لە حكومەت دەگرن بهێنێت و لە بنەڕەتەوە دادگاییكردنەكەی گوهدار زێباری نادادپەروەرانە بووە، لە كۆتا دادگاییشی تۆمەتی ساختەی بۆ هەڵبەستراوە، ئەمەش لە كاتێكدایە  نوێنەرانی چەندین كونسوڵخانە و ڕێكخراوە نێودەوڵەتییەكان، ڕێگەیان پێنەدراوە بەشداری دادگایییەكە بكەن".


 
رۆژنامەنووس و چالاكوان گوهدار زێباری یەكێكە لە سزادراوانی دۆسییەی زیندانیانی سیاسیی بادینان كە لەلایەن هێزە ئەمنییەكانی پارتییەوە لە 22ی 10ی 2020 دەستگیر كراوەو لەپاش تەواوبونی وادەی یاسایی دەستگیركردنەكەی لەلایەن هێزە ئەمنییەكانی پارتییەوە رێگە نەدرا ئازادبكرێت و بەبیانوی بونی چەك لەماڵەكەیدا جارێكیتر زیندانیەكەیان بۆ ماوەی شەش مانگ درێژكردەوە، لەكاتێكدا ئەو چەكەی كەلە ماڵەكەیدا دەستیبەسەرداگیراوەو پێی سزا دراوە تاپڕێكی باپیری بوەو وەك كەرەستەیەكی كەلەپوری هەڵیگرتووە، چونكە مێژووی ئەو تاپڕە دەگەڕێتەوە بۆ ئەو كاتەی كە ئینگلیز حوكمی هەرێمی كوردستانی كردووە، واتە زیاتر لە 100 ساڵ پێش ئێستا.

PUKMEDIA