یەکەم دیداری نیشتمانی لەساڵیادی کۆچیدوایی سەرۆک مام جەلال-دا بەڕێوەدەچێت

PUKMEDIA

دیداری نیشتمانی ساڵیادی کۆچیدوایی سەرۆک مام جەلال لە نەجەف

لە ساڵیادی کۆچی دوایی شکۆی نەتەوە و نیشتمان، سەرۆک مام جەلال دا لە نەجەف یەکەم دیداری نیشتمانی بەڕێوەدەچێت کە لەلایەن دامەزراوەی سەرۆک جەلال تاڵەبانی و دامەزراوەی بەحر ئەلعلوم سازکراوە.

سەرۆک کۆمار: مام جەلال سەرۆکی هەموو عیراقییەکان بوو

 لە سەرەتای کۆڕبەندەکەدا، د. لەتیف جەمال رەشید سەرۆک کۆماری عیراق لە وتارێکیدا رایگەیاند: "سەرۆک مام جەلال سەرۆکێک بوو بۆ هەموو عیراقییەکان و لە زۆربەی بارودۆخەکاندا عیراقی لە چەندین قەیران رزگارکردووە".

وتیشی: "خەباتی هاوبەشی نێوان سەرۆک مام جەلال و سەرکردە عیراقییەکان رۆڵێکی گرنگییان هەبووە لە رووخاندنی رژێمی بەعس و هێنانەکایەی فیدڕاڵی، نەجەفیش ئامادەییەکی زۆری هەبووە لە کلتور و کارلێکی سەرۆکی کۆچکردوودا، پەیوەندی پتەوی هەبووە لەگەڵ کەسایەتییە سیاسیی و زانستی و کۆمەڵایەتییەکانی نەجەف دا، کە کاریگەر بووە بە کەسایەتییەکانی ئەم ناوچەیە".

ئاماژەی بەوەشدا: "ئەمڕۆ ئێمە لەم تەلارە زانستییە کۆبووینەتەوە کە سەرۆکی کۆچکردوو بەشدارییەکی گەورەی کردووە لە دامەزراندنیدا کە وەک بەرزنرخاندنێکە لە رۆڵی سەرۆک مام جەلال بۆ پشتیوانیکردن لە ئاڕاستەی زانستی و ئەکادیمی کە بووەتە هۆی ئەو بەرەوپێشچوون و پەرەسەندنەی ئەمڕۆ پێی گەیشتووین، مایەی شانازیمانە کە ئەمڕۆ لەسەر رێبازە پیرۆزەکەی مام جەلال لێرە بەشداری دەکەین، پیرۆزبایی لە هەردوو دامەزراوەی بەحر ئەلعلوم و سەرۆک جەلال تاڵەبانی دەکەم بۆ ئەم کارە هاوبەشە".  

باڵیۆز د. محەمەد سابیر: سەرۆک مام جەلال بۆ هەموو عیراق هەوڵیداوە

هەر لە مەراسیمەکەدا باڵیۆز د. محەمەد سابیر سەرۆکی دامەزراوەی سەرۆک جەلال تاڵەبانی وتارێکی پێشکەش کرد و رایگەیاند: "دڵخۆشین کە ئەمڕۆ نۆبەرەی کاری هاوبەشی دامەزراوەی سەرۆک جەلال تاڵەبانی و دامەزراوەی بەحر ئەلعلوم، یەکەمین دیداری نیشتمانییە بۆ سەرۆک مام جەلال، بەوهیوایەین بتوانین چەندین کاروچالاکی زانستی و رۆشنبیری بە هاوبەشی لە نێوانماندا ئەنجام بدەین کە لە بەرژەوەندی رۆشنبیران و توێژەران و سیاسەتمەداران بێت". 

وتیشی: "سەرۆک مام جەلال تەنها موڵکی کورد و یەک ئایین و یەک نەتەوە نەبووە، بۆ هەموو عیراق هەوڵی داوە، ئەمڕۆ سلێمانی هاتووەتە شاری نەجەف و لەڕێگای هەردوو دامەزراوەکەوە یادی سەرۆک مام جەلال و عەلامە محەمەد بەحر ئەلعلوم و پەیوەندییەکەیان بەرز رادەگرین و لەڕێگەی ئەم کۆڕبەندەوە باس لە هەڵوێستە نیشتمانییەکانی مام جەلال و رۆڵی بونیادنەرانە و دادپەروەرانەی بکەین، هەروەها باس لە جێپەنجەی مام جەلال دەکەین لە قۆناغە مێژووییەکاندا کە عیراق پێیاندا تێپەڕیوە لە رۆژی دامەزراندنی دەوڵەتی عیراقەوە، هیچ قۆناغێک نییە کە جێپەنجەی روون و ئاشکرا بوونیادنەرانەی سەرۆک مام جەلالی پێوەنەبێت".

سەرۆکی دامەزراوەی بەحر ئەلعلوم: مام جەلال رۆڵی دیار و پێشەنگانەی هەبووە

محەمەد ئیبراهیم بەحر ئەلعلوم سەرۆکی دامەزراوەی بەحر ئەلعلوم وتارێکی پێشکەشکرد و رایگەیاند: "مایەی شانازیمە کە شاری نەجەف، شاری زانست و کۆشش و خەبات، یەکەمین دیداری نیشتمانی بۆ کەسایەتییەکی دیاری نیشتمانی لەخۆبگرێت کە رۆڵێکی دیار و پێشەنگانەی هەبووە لە بەرگریکردن لە عیراقییەکان لە سەردەمی دیکتاتۆری".

وتیشی: "دامەزراوەکەمان لەگەڵ دامەزراوەی سەرۆک جەلال تاڵەبانی کاریکردووە بۆ رێزنان لەو کەسایەتییە ناوازە و تایبەتە کە ریبازێکی نیشتمانییانەی هەبووە بۆ ئیدارەدانی وڵات بە ئامانجی چەسپاندنی شوناسی نیشتمانی".

ئاماژەی بەوەشدا: "کەسایەتی سەرۆکی کۆچکردوو کۆمەڵێک تایبەتمەندی لەخۆگرتبوو، وەکو رۆشنبیری و زیرەکی و لێوەشاوەیی، ئەمەش وایکرد کە سیاسەت و رۆشنبیری لە کەسایەتییە نیشتمانپەروەرییەکەیدا کۆبکاتەوە و بیکاتە یەکێک لە خەسڵەتە دیارەکانی ژیاننامەی خۆی".

PUKMEDIA