riklam

سەرکردە عیراقییەکان: مام جەلال ژیانی بۆ خەباتی دیموکراتی تەرخانکرد

کوردستان 06:22 PM - 2023-10-03
مەراسیمی ساڵیادی کۆچی دوایی سەرۆک مام جەلال لە بەغدا PUKMEDIA

مەراسیمی ساڵیادی کۆچی دوایی سەرۆک مام جەلال لە بەغدا

یەکێتیی نیشتمانیی کوردستان سەرۆک مام جەلال

بە ئامادەبوونی سەرۆکی یەکێتیی نیشتمانیی کوردستان و سەرۆک کۆماری عیراق و سەرۆک وەزیرانی عیراق و چەندنین سەرکردەی عیراقی و سەفیر و نێردەی وڵاتان، مەراسیمی شەشەمین ساڵیادی کۆچی دوایی سەرۆک مام جەلال لە بەغدا بەڕێوەچوو.

مەراسیمەکە بە سەرپەرشتی د. لەتیف جەمال رەشید سەرۆک کۆماری عیراق بەڕێوەچوو کە بافڵ جەلال تاڵەبانی سەرۆکی یەکێتیی نیشتمانیی کوردستان و قوباد تاڵەبانی و محەمەد شیاع سودانی سەرۆک وەزیرانی عیراق و شاناز ئیبراهیم ئەحمەد خانمی یەکەمی عیراق و جینین پلاسخارت نێردەی نەتەوە یەکگرتووەکان و عەممار حەکیم سەرۆکی رەوتی حیکمە و چەندین سەرکردەی عیراق و نێردەی وڵاتان تێیدا بەشداربوون.

سەرەتای مەراسیمەکە بە سرودی نیشتمانی عیراق دەستیپێکرد و پاشان چەند ئایەتێک لە قورئانی پیرۆز خوێندرایەوە، دواتریش فیلمێکی دۆکیۆمێنتاری لەسەر ژیانی سەرۆک مام جەلال بەناوی (مام جەلال سەرکردەی هەموو سەردەمەکان) نمایش کرا.

سەرۆک کۆمار: مام جەلال ژیانی بۆ یەک ریزی و تەبایی تەرخان کرد

دواتر د. لەتیف جەمال رەشید سەرۆک کۆماری عیراق رۆڵی سەرۆک مام جەلالی لە عیراقی نوێ بەرز نرخاند و رایگەیاند: "مام جەلال ژیانی بۆ یەک ریزی و تەبایی گەلی عیراق تەرخان کرد و لەو چوارچێوەیەشدا هەوڵی زۆریدا، مێژووش شاهێدی ئەو راستییە دەدات کە تەمەنی مام پڕ لە خەبات و شانازییە".

وتیشی: "مام جەلال پاریزەری مافەکانی هەموو گەلی عیراق بوو، هەر بۆیە لەلایەن سەید عەلی سیستانی مەرجەعی باڵا نازناوی سەمامی ئەمانی پێبەخشراوە، مام ژیان و خەباتی زۆر لەوە گەورەترە کە ئێمە بتوانین لە مەراسیمێکی لەمشێووەیەدا، یاخود لە چەند دێڕێکدا باسی بکەین، لەخوای گەورە داواکارین رۆحی پاکی بە بەهەشتی بەرین شاد بکات".


دەقی وتارەکەی سەرۆک کۆمار:

 خوشکان برایان 
  ئامادەبووانی بەڕێز...
سڵاوی خوداتان لێبێت ..

 ئەمڕۆ کۆدەبینەوە بۆ یادکردنەوەی یەکێک لە دیارترین سەرکردە نیشتمانییەکانی عێراق و سیمبولی نەمری کورد، سەرۆک مام جەلالی نەمر، کە لە ماوەی ژیانیدا توانی بەژیری خۆی هەموان کۆبکاتەوە و ڕیزەکانی گەل و هەڵوێستەکان یەکبخات، بۆ ڕووبەڕووبوونەوەی دەسەڵاتێکی تۆتالیتاری کەنادادپەروەری دەرهەق بە گەلی عێراق پراکتیزە دەکرد ئێستاش لە ساڵیادی کۆچی دواییدا، هەموانی کۆکردۆتەوە  و ئەوە بیر دێنێتەوە کە عێراق و گەلەکەی لە هەموو بەرژەوەندییەکی تایبەتی و تەسک گەورەتر.

 من مام جەلال هەر لەو سەردەمەوە کە خوێندکاری ئامادەیی بوم دەناسم، هاوڕێ و مامۆستا و سەرکردە بووە و پەیوەندییە کۆمەڵایەتییەکانم بە درێژایی تەمەنم مایەی ورەبەخشی و شانازی بوون بۆم.

سەرۆک مام جەلال سەلماندی کە بەشێکی دانەبڕاوە لە خەڵکی کوردستان و عێراق، بەو پێیەی سیمبولی نیشتمانی کورد و عێراقە کە ڕابردوو و ئێستا و داهاتووی عێراق شانازی پێوە دەکات.

 کۆچکردووی مەزن جێیهێشتین کە زۆربەی ژیانی لە نێوان وڵاتانی عەرەبی و ئەوروپی و وڵاتانی دیکەدا بەسەربرد و دۆزی  گەورەی رەوای گەل لەگەڵ خۆیدا هەڵگرتبوو، بە خەباتی بێ وچانی ڕژێمی پێشووی چاوترسێنکرد و لە ڕێگەی ئەم خەباتەوە کە چەندین دەیە بەردەوام بوو، هیوا و ئومێدی بۆ گەل و وڵات لە ژیانێکی ئازاد و شکۆمەند و دیموکراسیدا بەدیهێنا ، هاوکات خەباتی ئەو لە پێناو بەدیهێنانی عێراقێکی دیموکراسی بو لەسەر بنەمای فرەیی و گواستنەوەی ئاشتیانەی دەسەڵات و باوەڕبوون بە بیروڕای جیاواز.

 ڕێبەری مەزن مام جەلال جێی هێشتین و پاشخانێکی گەورەی خەباتی بەجێهێشتووە کە گەلی کوردستان شانازی پێوە دەکات. مام جەلال  ڕووناکی و چرای ئومێد و ڕێنیشاندەر بوو بۆ عێراقێکی ئازاد و سەقامگیر، ئۆغری ئەو کەلێنێکی گەورەی دروستکرد کە پڕکردنەوەی ئەستەمە، بەڵام پاشخانە گەورەکەی بووەتە ڕێنوێنی بۆ هەموو ئەوانەی کە سەرکردایەتی دەوڵەت و حزبەکان دەکەن، ئێمەش بەردەوام دەبین لەسەر ڕێبازەکەی.

مام جەلال تەنها خولیای سیاسەت نەبوو، بەڵکو تیۆریستێکی کۆمەڵایەتی و ڕۆشنبیر بوو، پێی وابوو ژیانێکی ئازاد و شکۆمەندانە بەبێ دادپەروەری کۆمەڵایەتی بەدینایات.

 لە سەرکردەی مەزن مام جەلالەوە فێربووم کە دانیشتنە تایبەتی و گشتیەکان و تێکەڵبوون بە کۆمەڵ پێویستە، بۆ ئەوەی بە خەمی خەڵک و کێشەکانیان ئاشنابیت، سەرکردەی ڕاستەقینە ئەوەیە کۆمەڵگە بونیادەنێت و رۆڵەکانیشی بە  ڕاستگۆیی جۆش دەکات، مام جەلال بە درێژایی ژیانی کاری کرد بۆ ئەوەی تێکەڵ بە کۆمەڵگە بێت و ئاگاداری کێشەو گرفتەکانیان بێت.

بە پابەندبوون بە ڕێبازە پڕ بەرهەمەکەی، لەو کاتەوەی ئەرکی خۆمان لە ئەستۆ گرتووە، کارمان کردووە بۆ ئەوەی سەردانی مەیدانی بکەین تا لە نزیکەوە گوێبگرین و تێبگەین لەوەی کۆمەڵگە بەدەست چییەوە دەناڵێنێت و ئەو کێشە و ئاستەنگانەی کە ڕووبەڕووی دەبێتەوە و ئەو بەربەستانە چین لە بەردەم ژیانیدا دروست دەکەن .

ڕێبەر مام جەلال هەموو مێژووی خەبات و ئەزمونی کۆمەڵایەتی خۆی خستە خزمەتی عێراقەوە، ئەو سەرکردەیە بوو کە کاری دەکرد بۆ بەرزکردنەوەی وورە لە سەردەمێکدا کە نائومێدی باڵی کێشا بو  بەسەر  خەڵکیدا لە ئەنجامی گۆشەگیری و نادادپەروەری و بەکارهێنانی توندوتیژی لە ڕادەبەدەر، دەرخستنی ئەو ڕاستییەی کە هیچ دەسەڵاتێک لە دەسەڵاتی گەل گەورەتر نییە و هیچ ویستێک نییە کە لە ویستی گەل باڵاتر بێت.

سەرۆک مام جەلال پێی وابوو گەلی عێراق بە فرەچەشنی و پێکهاتەکانیەوە هێزن نەک لاوازی، وەک هەمیشە دەستەواژەی(هەموومان پێکەوە چەپکە گوڵەکەین) دووبارە دەکردەوە، لێرەوە دەست پێ دەکات هاوشانی هاوەڵانی خەباتگێری لە هەموو پێکهاتەکانی گەلی عێراق بۆ دانانی بناغەکانی سیستمی سیاسی نوێ لە دوای ساڵی ٢٠٠٣.

هاوکات لایەنی نێودەوڵەتی فەرامۆش نەکرد، بەو پێیەی لە نێوان ڕێکخراوە نێودەوڵەتی و هەرێمایەتییەکان لە کاردا بو، هەروەها خەمەکانی گەلی خستبوە  سەرشانی، کاری دەکرد بۆ کۆکردنەوەی هەوڵە نێودەوڵەتییەکان لە پێناو دۆزی رەوای عێراق، هەروەها  بێ وچان هەوڵیدەدا بۆ دەرخستن و پەردەهەڵماڵین لەسە کارە قێزەون و خوێناوییەکانی ڕژێمی پێشوو.

 سەرۆک مام جەلال تەمەنی لە خەباتی چەکداریدا بەسەر بردووە، بەڵام پێی وابوو کە چارەسەری ئاشتیانە باشترین ڕێگایە بۆ ژیانێکی ئاسودە و سەقامگیر و وشەی ئاشتی هەرچەندە گەورە بێت، لە بەڵای جەنگدا بچوکتر دەمێنێتەوە، بۆ ئەمەش ژیان و سامانی گەلان هەمیشە بە نرختر دەبێت.

داوای لێبوردن دەکەم بۆ کورتی وتارەکەم، لەبەرئەوەی ژیان و پێگە و مێژووی سەرکردە مام جەلال زۆر گەورەترن و ناتوانرێت بە لاپەڕە یان چەند دێڕێکی کورت گوزارشتیان لێ بکرێت هەروەک چۆن وتەی مەرجەعی  باڵا، سەماحەتی سەید عەلی سیستانی وەسفی کردووە بە (سەمامی ئەمانی عێراق). 



 نەمری بۆ سەرکردەی مەزن مام جەلال  .
سەرەخۆشی لە دڵەوە بۆ هەڤاڵان و خانەوادە و شوێنکەوتوانی رێبازەکەی.

سڵاوی خوداتان لێ بێت.

 

سودانی: گەلەکەمان سەرکردەیەکی گەورەی لەدەستدا

محەمەد شیاع سودانی سەرۆک وەزیرانی عیراق لە مەراسیمەکەدا وتارێکی پێشکەشکرد و رایگەیاند: "شەش ساڵ پێش ئێستا عیراق رۆژێکی خەمناکی بەڕێکرد و سەرکردەیەکی گەورەی وەک مام جەلالی لەدەستدا کە پڕکردنەوەی ئەو جێگەیەی ئەستەمە".

وتیشی: "سەرۆک تاڵەبانی ژیانی خۆی بۆ عیراقییەکان و دیموکراسی لە عیراق تەرخان کرد، بۆیە هەمیشە ناوی بە بەرزی دەمێنێتەوە، لەم مەراسینەشدا جوابترین وشە و رەحمەتی بۆدەنێرین و لە خوای گەورە داواکارین لێی خۆشبێت"

هەر لە وتەکەیدا سەرۆک وەزیرانی عیراق رایگەیاند: "بە دەرفەتی دەزانم لەم مەراسیمەدا پیرۆزبایی گەرم لە بافڵ جەلال تاڵەبانی بکەم بەبۆنەی هەڵبژاردنەوەی بە سەرۆکی یەکێتیی نیشتمانیی کوردستان، هەروەها پیرۆزبایی لە سەرکردایەتی نوێی یەکێتی دەکەم".

عەممار حەکیم: هیچ کات مام دەستبەرداری مافی گەلەکەی نەبووە

عەممار حەکیم سەرۆکی رەوتی حیکمە لە مەراسیمەکەدا وتارێکی پێشکەش کرد و بە گرنگییەوە باسی لە رۆڵی سەرۆک مام جەلال لە عیراقی نوێدا کرد و رایگەیاند: "سەرۆک مام جەلال هەوڵ و کۆششی لە عیراقێکی نوێی دیموکراسی دیارە و بۆ گەلی کوردیش هیچ کاتێک دەستبەرداری سیاسەت و مافی گەلەکەی نەبووە، بۆ ئامانجەکانی گەلەکەی هەوڵیداوە".

وتیشی: "وەک بنەماڵەی ئەلحەکیم پەیوەندی قوڵ و دورودرێژمان لەگەڵ مام جەلال و گەلی کورد دا هەیە و شانازی پێوەدەکەین، چونکە هەردوولامان بۆ یەک ئامانج قوربانیمان هەیە کە ئەویش عیراقێکی دیموکراسییە".

ئەوەشی خستەڕوو: "سەرۆک مام جەلال هەر لە سەرەتای تەمەنییەوە دژی زوڵم و ستەم وەستاوەتەوە و هەوڵی بونیادنانی بناغەیەکی دیموکراسی لە دەستوردا داوە، هەر ئەمەش وایکردووە کە هەموومان بە سەرکردەیەکی نیشتمانی بزانین، لەم مەراسیمەدا لە خوای گەورە داواکارین لە رۆحی پاکی سەرۆک مام جەلال خۆشبیت".

باڵیۆز د. محەمەد سابیر: گەلی عیراق یادی مام دەکەنەوە

پاشان باڵیۆز د. محەمەد سابیر سەرۆکی دامەزراوەی سەرۆک جەلال تاڵەبانی کە سەرپەرشیاری مەراسیمەکە بوو، وتەیەکی پێشکەش کرد و بەناوی بنەماڵی مام جەلال، سوپاسی میوانانی کرد و رایگەیاند: "مام جەلال تەنها سەرۆکی کورد نەبوو، بەڵکو سەرۆکی هەموو عیراقییەکان بووە و گەلی عیراق یادی مام دەکەنەوە و لەبیری ناکەن".

وتیشی: " مام جەلال هەمیشە هەوڵی یەک ریزی و تەبایی و ئاشتی لەنێوان پێکهاتەکانی گەلی عیراق داوە و هەوڵی دووبارە بونیادنانەوەی عیراق  وپاراستنی سەروەرییەکەی داوە، هەروەها هاوڕێ و دۆستی نزیکی سەرجەم لایەنە عیراقییەکان بووە و کلیلی چارەسەری کێشەکان بووە و وەک دامەزراوەی سەرۆک جەلال تاڵەبانی-یش لە ناخی دڵمانەوە سوپاسی بەشداربووانی مەراسیمەکە دەکەین کە ئەم ئێوارە کۆبووینەوە بۆ یادی کۆچی دوایی سەرۆک مام جەلال".

ئەمڕۆ شەش ساڵ بەسەر کۆچی دوایی سەرۆک مام جەلال دا تێدەپەڕێت، لە ساڵیادی کۆچی دوایی شکۆی نیشتماندا لە سلێمانی تاجە گوڵینەی رێز و وەفا لەسەر مەزاری مام دانرا و هەر ئەمڕۆش لە بەغدا مەراسیمێکی شایستە لە ساڵیادی کۆچی دوایی سەرۆک مام جەلال دا بەڕێوەچوو، هەر لە چوارچێوەی ساڵیادی کۆچی دوایی سەرۆک مام جەلال دا، دامەزراوەی سەرۆک جەلال تاڵەبانی و دامەزراوەی بەحر لعلوم، سەعات 11ـی پێشنیوەڕۆی رۆژی 4ـی ئۆکتۆبەر لە نەجەف دیدارێک کە چەند پانێڵیک لەخۆدەگرێت سازدەکەن، تێیدا چەند توێژینەوەیەک لەبارەی سەرۆک مام جەلال دەخرێنەڕوو.
PUKMEDIA

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket