ساڵیادی کۆچی دوایی سەرۆک مام جەلال لە بەغدا بەڕێوەدەچێت

PUKMEDIA

مەراسیمی ساڵیادی کۆچی دوایی سەرۆک مام جەلال لە بەغدا

مەڕاسیمی ساڵیادی کۆچی دوایی سەرۆک مام جەلال (شکۆی نیشتمان)، بە دانانی تاجەگوڵینە لەسەر مەزاری سەرۆک مام جەلال لە شاری سلێمانی دەستیپێکرد و دوانیوەڕۆی ئەمڕۆش لە بەغدا مەڕاسیمی ساڵیادی کۆچی دوایی سەرۆک مام جەلال لەژێر چاودێری د. لەتیف جەمال رەشید سەرۆک کۆمار و بە ئامادەبوونی بافڵ جەلال تاڵەبانی سەرۆکی یەکێتیی نیشتمانیی کوردستان و قوباد تاڵەبانی و محەمەد شیاع سودانی سەرۆک وەزیرانی عیراق و سەرکردە عیراقییەکان بەڕێوەدەچێت.

لە مەراسیمەکەدا کە خاتوو شاناز ئیبراهیم ئەحمەد خانمی یەکەمی عیراق ئامادەیبوو، جینین پلاسخارت نێردەی نەتەوە یەکگرتووەکان و سەفیر و نێردەی وڵاتان لە عیراق بەشداری ساڵیادی کۆچی دوایی سەرۆک مام جەلال-یان کرد.

ئەمڕۆ سێ شەممە 3-10-2023، شەش ساڵ بەسەر کۆچی دوایی سەرۆک مام جەلال دا تێدەپەڕێت و چەندین مەراسیمی شایستە بۆ ساڵیادی کۆچی دوایی سەرۆک مام جەلال رێکخران کە سەرەتا لە شاری سلێمانی لەسەر مەزاری سەرۆک مام جەلال تاجەگوڵینەی رێز و وەفا دانرا و  هەمان رۆژیش لە بەغدا لەلایەن دامەزراوەی سەرۆک جەلال تاڵەبانی، مەراسیمی ساڵیادی کۆچی دوایی سەرۆک مام جەلال بەڕێوەدەچێت.

پێشتر باڵیۆز د. محەمەد سابیر سەرۆکی دامەزراوەی سەرۆک جەلال تاڵەبانی بە سایتی رەسمی یەکێتیی نیشتمانیی کوردستان PUKMEDIA ی رایگەیاندبوو: "مەراسیمی ساڵیادی کۆچی دوایی سەرۆک مام جەلال لە سلێمانی  و بەغدا و نەجەف دەبێت". وتیشی: "لە بەغدا ساڵیادەکە لەژێر چاودێری سەرۆک کۆمار و بە ئامادەبوونی سەرۆکی یەکێتی بەڕێوەدەچێت کە سەرکردە عیراقییەکان تێیدا بەشدارن و وتاریان دەبێت".

سەرۆکی دامەزراوەی سەرۆک جەلال تاڵەبانی راشیگەیاندبوو: "هەر لە چوارچێوەی ساڵیادی کۆچی دوایی سەرۆک مام جەلال دا، دامەزراوەی سەرۆک جەلال تاڵەبانی و دامەزراوەی بەحر لعلوم، سەعات 11ـی پێشنیوەڕۆی رۆژی 4ـی ئۆکتۆبەر لە نەجەف دیدارێک کە چەند پانێڵیک لەخۆدەگرێت سازدەکەن، تێیدا چەند توێژینەوەیەک لەبارەی سەرۆک مام جەلال دەخرێنەڕوو، هەروەها رۆژی 10ـی ئۆکتۆبەر، کورتە فیلمێک لەبارەی ژیانی سەرۆک مام جەلال لە سلێمانی نمایش دەکرێت".

جێی ئاماژەیە، لە پێنجەمین کۆنگرەی یەکێتیی نیشتمانیی کوردستان دا کە رۆژی 27-9-2023 دەستیپێکرد و ماوەی پێنج رۆژی خایاند، تێیدا سەرۆک مام جەلال وەک شکۆی نەتەوە و نیشتمان ناسێندرا.
PUKMEDIA