گەلاوێژ خان: مام جەلال، شكۆی ئەو نەتەوەیەی هەرگیز نامرێت

ئەرشیف

خاتوو گەلاوێژ لەسەر مەزاری مام

خاتوو گەلاوێژ لە ساڵیادی ژیان ئاوایی شکۆی نەتەوەو نیشتمان، سەرۆک مام جەلالدا لە نوسینێکیدا بڵاوی دەکاتەوە: "شۆڕشەكەی تۆ ئەی ڕابەر، وەك فانۆسی گوندێكی ئەو بنارە، دڕی بە تاریكایی نسكۆی خەباتێكی چەكداریی ئەو سەردەمە دا و هەزاران ئەستێرەی شەهیدی خستە ئاسمانی كوردستانەوە و هەزاران گوڵاڵەسوورەی شەهیدی پێشكەش بە خاك كرد".

دەقی نوسراوی خاتوو گەلاوێژ.....

لەیادی شكۆی ئەو نەتەوەیەی هەرگیز نامرێت

وا ساڵ وەرچەرخایەوە و مامی گەورە بەجەستە لامان نییە بەڵام گیانی بەرزەفڕی بەسەر تاك بە تاكی كورد و هەموو ئازادیخوازانی جیهانەوەیە، بەڵام بیری وردی قوتابخانە و فەلسەفە و ڕێبازەكەی بوونەتە شكۆی نەتەوەیەك و یار و نەیار بەوپەڕی ستایشەوە یادی دەكەنەوە.

تۆ هێشتا منداڵ بوویت، بەڵام منداڵێكی بزێو و چالاك كە بیری كوردایەتی و یەكسانیخوازیی وەك كانیی بناری هەیبەت سوڵتان زایە ناو مێشكی تازە خەمڵیو بە بیری سیاسی و ڕۆشنبیری و كۆمەڵایەتیتەوە، كە بویشیت بە خەڵفێكی تازە نەمام ئیدی وردەوردە لەوە دەرچوویت كە كوڕی ماڵێك و خێزانێك و ئەندامی خێڵێك بیت، بەڵكو بوویتە درەختێكی ڕەگداكوتراو و ڕۆچوو بەخاكی نیشتیماندا و پەلوپۆت دەیان هەزار گەڵای سەوز و هەزار میوەی جۆراوجۆری گرت كە هەوان لە سێبەریدا دەحەسانەوە و تامیان دەكرد.

خۆ كاتێك كە بوویتە جحێڵێكی خورت و پێگەیشتوو ئیتر نەك خەڵكی كوردستان بەڵكو دار و بەردی نیشتیمان تۆیان ناسی و ئینجا شار بەشار و پایتەخت بە پایتەختی وڵاتان دەگەڕایت بۆ گەیاندنی دەنگی كپكراوی نەتەوەكەت بە هەموو لایەك.

 
نەوەستایت و شاخ بەشاخ و دۆڵ بەدۆڵ و دێ‌ بەدێ‌ و شار بەشار و وڵات بەوڵات سەركردایەتیی شۆڕشێكت كرد كە لەنێوان چوار دڕندەی دژی نەتەوەكەتدا نەعرەتەی لێدەدا، شۆڕشێك كە جارێك وەك پڵنگ هەڵمەتی دەبرد و جارێك وەك شێری بریندار بەرگریی لە خۆی و لە گەلەكەی دەكرد.. نەوەسایت و كاروانی شۆڕشت گەیاندە هەوار.

 
هێشتا هەر سەرەتای دەستپێكی ئێوەبوو كە كارەساتێكی قورس بەسەر جووڵانەوەكەدا هات و پۆلێك سەركردە و پێشمەرگەی عەوداڵی ئازادیی شەهیدكران. هێشتا هەر سەرەتای دەستپێكی شۆڕشەكەی ئێوە بوو كە ژمارەیەك سەركردەی دیار گەورەترین سەروەرییان لە زیندانەكاندا تۆماركرد و سەربەرزانە چوونە بەر پەتی سێدارە. بەڵام كاروانی خوێن لێ‌ ڕۆیشتووی شۆڕش بە سەركردایەتیی تۆ هەروا دەڕۆیشت و بەرەو مەنزڵ هەنگاوی پێشمەرگانەی دەنا.

 
شۆڕشەكەی تۆ ئەی ڕابەر، وەك فانۆسی گوندێكی ئەو بنارە، دڕی بە تاریكایی نسكۆی خەباتێكی چەكداریی ئەو سەردەمە دا و هەزاران ئەستێرەی شەهیدی خستە ئاسمانی كوردستانەوە و هەزاران گوڵاڵەسوورەی شەهیدی پێشكەش بە خاك كرد و هەزاران زایەڵەی خۆڕاگریی گەیاندە زیندانە تاریك و نووتەكەكان.

 
ڕۆژێك نەبوو هەر لە قەندیلی سەركەشەوە هەتا دەشتی كاكی بەكاكیی گەرمیان داستانێك تۆمار نەكرێت و گورزێكی پشتشكێن لە دوژمنانی كورد و ئازادی و دژەماف نەدرێت، هەروەك ڕۆژێكیش نەبوو پۆلێك هەڵۆی بەرزەفڕ نەدەن لە شەققەی باڵ و خوێنی گەشیان نەڕژێتە سەر ئەم نیشتمانە دێرینەی كوردان، لەگەڵ ئەوەیشدا ڕۆژێك نەبوو ئێوە و هاوڕێكانت، بەتایبەتی تۆی سەركردە، نائومێد ببن و دەستبەرداری ئەو ئامانجە ببن كە لەپێناویدا دەژیان.

 
تۆ بە پێشمەرگایەتی دەستتپێكرد و سەركردایەتیی ئەو شۆڕشەت كرد كە گەیانتە مەنزڵی تائەمڕۆ، لەچیاكانەوە بەورئاسا دابەزیت و بوویت بەو كوردەی كە بۆ یەكەمجار و بە هەڵبژاردن بوویتە سەرۆكی ئەو وڵاتەی كە سەرۆكەكەی لێبووردنی بۆ هەموان دەركرد تۆ نەبێت!.

 
كە بوویت بە سەرۆكیش، وڵاتێكی پڕ لە ئاشووبی تایەفەگەری و بیری توندڕەوییت بەجۆرێك ئارام كردەوە كە دۆست و دوژمنت لەسەر یەك مێز دادەنیشاند و ئامۆژگاریت دەكردن. لەو لایشەوە (مورافەعە)ی سنوورەكانی باشووری كوردستانەكەی خۆتت بەڕوودا دەدا و كۆنترین نەخشەكانی مێژووت دەخستە بەردەمیان.

 
لەم ڕۆژەدا دەڵێین ئێمەی كورد بەوە سەربەرزین كە خاوەنی تۆین و تۆیش خاوەنی ئێمەیت، بەوە سەربەرزین كە سەرۆكێكی وەك تۆمان پێشكەش بە مێژووی كوردستان و عێراق و ناوچەكە و جیهانیش كرردووە.

 
سڵاو و درود بۆ گیانی بەرزت.
گەلاوێژ

PUKMEDIA