شێخ جەعفەر شێخ مستەفا: یەكێتی بەرامبەر تێكۆشەرەكانی بەوەفایە

ئەژی عومەر

شێخ جەعفەر شێخ مستەفا

لە پێنجەمین رۆژی كۆنگرەدا شێخ جەعفەر شێخ مستەفا بە لێپرسراوی ئەنجومەنی بەرژەوەندییە باڵاکانی یەكێتی هەڵبژێردرا و رایگەیاند: "بە هەڵبژاردنم بۆ ئەو پۆستە یەكێتی سەلماندی كە بۆ تێكۆشەرانی خۆی بەوەفایە، ئەم پۆستەش بەتەنها موڵكی من نییە، بەڵكو موڵكی شەهیدان و تێكۆشەران و كەمئەندامانە".

شێخ جەعفەر شێخ مستەفا لە لێدوانێكیدا بۆ كەناڵی گەلی كوردستان رایگەیاند: "بە زۆرینەی دەنگی ئەندامانی كۆنگرە بۆ پۆستی لێپرسراوی ئەنجومەنی بەرژەوەندییە باڵاکانی یەکێتی هەڵبژێردرام، هەر پلە و پۆستێكم هەبێت موڵكی من نییە، بەڵكو موڵكی شەهیدان و تێكۆشەران و زیندانیانی سیاسی و كەمئەندامانە، ئەم پلەیە ئەركێكی گرانە، بۆیە بەهێزكردنی یەكڕیزی گەلەكەمان و  یەكێتی ناو یەكێتی و بەهێزكردنی پێگەی یەكێتی ئەركی لە پێشینەمان دەبێت".

"بە هەڵبژاردنم بۆ پۆستی لێپرسراوی ئەنجومەنی بەرژەوەندییە باڵاکانی یەکێتیی نیشتمانیی کوردستان، دەركەوت تێكۆشەران و سەركردایەتی و سەرۆكی یەكێتیی نیشتمانیی كوردستان بەرامبەر بە تێكۆشەرانیان بەوەفان و رێزیان لێدەگرن، بۆیە یەكێتی بوون شانازی و شەرەفمەندییە" شێخ جەعفەر شێخ مستەفا وادەڵێت.

راشیدەگەیەنێت: "ئەو هەڤاڵانەی دەبنە ئەندام لە ئەنجومەنی بەرژەوەندییە باڵاکانی یەكێتیی نیشتمانیی کوردستان، دەبێت كەسانی شایستە و تێكۆشەربن و لەڕێی كارەكانیانەوە هەوڵ بۆ سەرخستنی بەرنامەی یەكێتیی نیشتمانیی كوردستان بدەن".

لێپرسراوی ئەنجومەنی بەرژەوەندییە باڵاکانی یەکێتی وتیشی: "پێنجەمین كۆنگرەی یەكێتیی نیشتمانیی كوردستان كۆنگرەیەكی سەركەوتوو بوو و ئەندامان ئازادانە گفتوگۆی سەرجەم بڕگە و خاڵەكانی پەیڕەوی ناوخۆیان كرد و دەنگیان لەسەردا". 

لەبارەی بافڵ جەلال تاڵەبانی سەرۆكی یەكێتیی نیشتمانیی كوردستان-یشەوە شێخ جەعفەر شێخ مستەفا وتی: "سەرۆك بافڵ پیاوێكی ئازا و بوێر و بە هەڵوێستە و لەسەر پرسە نەتەوەییەكان هیچ سازشێك ناكات و لەگەڵ یەكێتی و تەبایی و یەكڕیزی میللەتەكەماندایە".

ئەمڕۆ 1-10-2023، پاش سێ رۆژ گفتوگۆی ورد و چڕ لەبارەی پەیڕەوی ناوخۆی یەكێتیی نیشتمانیی كوردستان، لە پێنجەم رۆژی كۆنگرەكەدا، لەلایەن ئەندامانەوە تەواوی پەیڕەوی ناوخۆی حزب پەسندكرا و شێخ جەعفەر شێخ مستەفا بە لێپرسراوی ئەنجومەنی بەرژەوەندییە باڵاکانی یەکێتیی نیشتمانیی کوردستان هەڵبژێردرا.


PUKMEDIA