پێنجەم رۆژی کۆنگرە بەردەوامە

PUKMEDIA

پێنجەمین کۆنگرەی یەکێتیی نیشتمانیی کوردستان

پێنجەمین رۆژی کۆنگرەی یەکێتیی نیشتمانیی کوردستان بەردەوامە و چاوەڕێش دەکرێت ئەمڕۆ ئەندامانی سەرکردایەتی یەکێتی هەڵبژێردرێن.

ئەمڕۆ یەك شەممە  1-10-2023،  پێنجەمین رۆژی کۆنگرەی یەکێتیی نیشتمانیی کوردستان بەردەوامی هەیە، ئەمە لەکاتێکدایە لەچوار رۆژی رابردووی پێنجەمین کۆنگرەی یەکێتی دا، بەشێک لە ماددەکانی پەیڕەوی ناوخۆ پەسەند کران، چاوەڕوان دەکرێت ئەو ماددانەی پەسەند نەکراون ئەمڕۆ بڕیاریان لەسەر بدرێت.

پێشتریش تەلار لەتیف وتەبێژی پێنجەمین کۆنگرەی یەکێتیی نیشتمانیی کوردستان بە PUKMEDIA ی راگەیاندبوو: "کە ئەمڕۆ کۆنگرەی پێنجەمی یەکێتیی نیشتمانیی کوردستان بەردەوامدەبێت و ئەو ماددانەی پەیڕە و کە ماون پەسەند دەکرێن، تا ئێستا 44 ماددەی پەیڕەوی ناوخۆی حزب دەنگی لەسەر دراوەو ئەمڕۆش دەنگ لەسەر ماددەکانی دیکە دەدرێت و دوای پەسەندکردنی سەرجەم ماددەکانی پەیڕەوی ناوخۆ، هەڵبژاردن بۆ ئەندامانی سەرکردایەتی دەکرێت".

پێنجەمین کۆنگرەی یەکێتیی نیشتمانیی کوردستان، رۆژی چوار شەممە 27-9-2023، لە شاری سلێمانی لە تەلاری هونەر دەستیپێکرد و بڕیاربوو لە ماوەی سێ رۆژدا کارەکانی تەواو ببێت، بەڵام بەهۆی گفتوگۆی وردی ماددەکانی پەیڕە و نەتوانرا تەواوی ماددەکانی پەیڕەو دەنگی لەسەر بدرێت، بۆ ئەو مەبەستەش لەلایەن سەرۆکی یەکێتییەوە کاتی زیاتر درا بە ئەندامانی کۆنگرە و چەند رۆژێک کاتی کۆنگرە درێژکرایەوە.

 
PUKMEDIA