سەرۆككۆمار: كەمتەرخەمانی رووداوەكەی حەمدانیە سزابدرێن

نوسینگەی راگەیاندنی سەرۆكایەتی كۆمار

سەرۆككۆمار لە حەمدانیە

د. لەتیف جەمال رەشید سەرۆككۆماری عیراق، ئەمڕۆ هەینی 29-9-2023، لەكڵێسای مار بەهنام و سارا سەرەخۆشی لە خانەوادەی قوربانی كارەساتەكەی حەمدانیەی كرد و پاشان سەردانی گۆڕستانی قیامەی لەشاری حەمدانیە كرد، هاوكات بەیاوەری وەزیری تەندروستی د.ساڵح حەسناوی سەردانی نەخۆشخانەی كۆماری لە پارێزگای موسڵ كرد.

بۆ بەدواداچوونی بارودۆخی شارەكە و سەردان و بەسەركردنەوەی كەسوكاری قوربانیان و بریندارەكانی كارەساتی ئاگر كەوتنەوە دڵتەزێنەكە، بەیاوەری وەزیری تەندروستی بەڕێز د. سالح حەسناوی، گەیشتە شاری حەمدانیە و لەلایەن وەزیری كۆچ وكۆچبەران خاتو ئیفان جابرۆ، پارێزگاری موصل، نەجم عەبدوڵڵا جبوری و ژمارەیەك لە بەرپرسانی پارێزگاكە پێشوازیی لێكرا .

پاشان سەرۆك كۆمار، سەردانی كڵێسای مار بەهنام و سارای قەزای حەمدانییەی لە پارێزگای نەینەوا كرد، بۆ دەربڕینی دڵتەنگی و سەرەخۆشی كردن لە قوربانیانی كارەساتەكە و هەریەك لە سەرۆكی ئوسقوفەكانی موصل و دوروبەری مەتران یونان حەنۆ ، پێشوازیی لێكرا،  هەر لەمیانی سەردانەكەیدا، سەرۆككۆمار پرسەو سەرەخۆشی قوڵی خۆی بۆ كەسوكاری قوربانیان  و سەرجەم خەڵكی شاری حەمدانیە دەربڕی بۆ ئەو كارەساتە پڕ ئازارە و ئاماژەی بەوەدا كە ئەو ڕووداوە هەموو عیراقییەكانی بە هەموو  پێكهاتەكانەوە غەمبار كرد.

لە وتەیەكەدا كە لە پرسەی قوربانیانی كارەساتەكە لە كڵێسای مار بەهنام و سارا بەڕێوەچوو  پێشكەش بە گیانی پاكی قوربانییەكان كرد و  رایگەیاند: "هەستی هەموو عیراقییەكان لەگەڵ خانەوادەی قوربانیان و بریندارەكاندایە"، راشیگەیاند: "ئەم كارەساتە لە دەرەوەی وڵاتیش دەنگدانەوەی و هاوسۆزی نێودەوڵەتی هەبووە و سەركردەكانی دەوڵەتان هاوخەمی و دڵتەنگییان بۆ ئەم تراژیدیا ئازاربەخشە دەربڕیوە ."

هەروەها ئاماژەی بەوەكرد:  "سەردانەكەمان بە مەبەستی بینینی  رووداوەكەیە و ئەو كاریگەرییە گەورەیەی لە دوای خۆی بەجێی هێشتووە، كە زیانێكی گەورەیە بۆ هەموو گەلی عێراق كە ئەمڕۆ لەگەڵ ئێوەدان" ، جەختیشی كردەوە لەوەی كە هەر لە كاتی رودانی ڕووداوەكەوە لەلایەن سەرۆكایەتی كۆمار و حكومەتەوە بەدواداچونی بۆ دەكرێت و سەرنجی بەردەوام هەیە بۆ گرنگیدان بە خانەوادەی شەهیدان و بێسەروشوێنەكان و دابینكردنی باشترین چارەسەر بۆ بریندارەكان و ئاماژەی بەشدا كە نابێت ئاسایش و سەقامگیری وڵات بەهۆی ئەو ڕووداوانەوە تێكبدرێت ودەبێ كەمتەرخەمانیش سزا بدرێن .

لە بەرامبەریشدا، قەشە یونان حەنۆ،  ستایشی سەردانەكەی سەرۆكی كرد بۆ شاری حەمدانیە، كە گرنگیدان و هاوسۆزی بەڕێزیان نیشان دەدات بۆ خانەوادەی قوربانییەكان، هاوكات ڕونكردنەوەیەكی سەبارەت بە كاریگەرییەكانی ئەنجامی رووداوەكە پێشكەش كرد.
 هەروەها داوای لێكۆڵینەوەیەكی دادپەروەرانە و شەفافی كرد لە هۆكارەكانی ئاگركەوتنەوەكە بۆ ئەوەی ئەوانەی بەرپرسن لە ڕوداوەكە ڕوبەڕوی دادگا بكرێن و قەرەبووی زیان لێكەوتوانیش بكرێتەوە.
 
هەر لەومیانەشدا سەرۆك كۆمار، چاوی بە ژمارەیەك لە كەسوكاری قوربانییەكان كەوت و گوێی لە داواكارییەكانیان و هۆكاری ڕووداوەكە گرت، جەختیشی لەوە كردەوە كە كەمتەرخەمی و نەبوونی مەرجی سەلامەتی و كەموكوڕی لە پاراستنی گیانی هاونیشتمانیان قبوڵناكرێت و ئەمەش پێویستی بەلێپرسینەوە لەو كەسانە هەیە كەكەمتەرخەم بوون، و هەركەسێك زیان بە هاووڵاتی و كۆمەڵگە بگەیەنێت دەبێت لێپرسینەوەی یاسایی لەگەڵدا بكرێت .

راشیگەیاند پشتگوێ خستنی بەدواداچوون و وردبینی كردن لەلایەنە پەیوەندیدارەكانەوە  كەمتەرخەمی یاسایی و خزمەتگوزارییە و پێویستی بە لێپرسینەوە و كاركردن هەیە بۆ ڕێگریكردن لە دووبارەنەبوونەوەی .
هەر ئەمڕۆ سەرۆككۆمار سەردانی گۆڕستانی قیامەی لەشاری حەمەدانیە كرد، بە یاوەری هەریەك لە وەزیرانی تەندروستی، بەڕێز د.ساڵح حەسناوی، كۆچ وكۆچبەران،خاتو ئیفان جابرۆ، پارێزگاری موسل، بەڕێز نەجم عەبدوڵا جبوری و ژمارەیەك لە بەرپرس و قەشەكانی پارێزگای موسڵ.

سەرۆككۆمار سورەتی فاتیحەی بۆ گیانی قوربانیانی كارەساتەكە خوێندو تاجە گوڵینەیەكی لەسەر گۆڕی قوربانیان دانا.

هاوكات سەرۆككۆمار بریندارانی كارەساتەكەی حەمدانیەی بەسەر كردەوە و لە بارودۆخی بریندارەكان و ئەو خزمەتگوزارییە پزیشكییانەی پرسی كە پێشكەشیان دەكرێت، هاوكات لەلایەن بەڕێوەبەری نەخۆشخانەوە لە بارودۆخی بریندارەكان ئاگاداركرایەوە، دواتر گوێی لە پێداویستییەكانیان گرت و جەختیشیكردەوە لەخستنەگڕی هەوڵەكان بۆ پێشكەكردنی هەموو پشتیوانییەك بە مەبەستی  چارەسەركردن و چاكبوونەوەی گشت بریندارەكان .


PUKMEDIA