یەکێتی ئامادەکارییەکانی بۆ کۆنگرە چڕدەکاتەوە

PUKMEDIA

سایتی پێنجەمین کۆنگرەی یەکێتیی نیشتمانیی کوردستان

تەنها دوو رۆژ ماوە بۆ بەستنی پێنجەمین کۆنگرەی یەکێتیی نیشتمانیی کوردستان و لەوچوارچێوەیەشدا ئامادەکارییەکان چڕکراونەتەوە و بەشداربووانی کۆنگرە لەمەڵبەند و مەکتەبەکان دیاریکراون، ئەندامێکی مەکتەبی سیاسیش دەڵێت:"پلانی پێنجەمین کۆنگرە نوێکردنەوەی یەکێتی و هێنانە پێشەوەی گەنجان و ژنانە بۆ ناو ئۆرگانەکانی یەکێتی".

یەکێتی خۆی نوێ دەکاتەوە

ستران عەبدوڵڵا ئەندامی مەکتەبی سیاسی یەکێتیی نیشتمانیی کوردستان رایگەیاند: "وەک چاوەڕوانماندەکرد کۆنفرانسی مەڵبەند و مەکتەبەکانی یەکێتی زۆر بە دیموکراسییانە بەڕێوەچوو، بۆ کۆنگرەش هەر ئەو چاوەڕوانییەمان هەیە".


ئەندامەکەی مەکتەبی سیاسی وتیشی: "پلانی پێنجەمین کۆنگرە نوێکردنەوەی یەکێتی و هێنانە پێشەوەی گەنجان و ژنانە بۆ ناو ئۆرگانەکانی یەکێتی و ئەمەش وادەکات حزبەکە نوێ ببێتەوە، یەکێتی لەگەڵ ئەوەی حزبێکی مێژووییە، حزبێکیشە بۆ ئایندە و هەیکەلی نوێی یەکێتی جێگای گەنجان و تێکۆشەرانیشی تێدایە و وادەکات یەکێتی بە رۆحێکی گەنجانە بەڕێوەبچێت".

٢٦٠ ئەندامی کۆنگرە لە مەڵبەند و مەکتەبەکان دیاریکران

لەچوارچێوەی ئامادەکارییەکانی کۆنگرە کۆنفرانسی مەڵبەند و مەکتەبەکان بەڕێوەچوو، کەتێیدا٢٦٠ ئەندامی بەشداربووی کۆنگرە دیاریکران.

تەلار لەتیف وتەبێژی پێنجەمین کۆنگرەی یەکێتیی نیشتمانیی کوردستان لەلێدوانێکی تایبەتدا بە PUKMEDIA ی راگەیاند: لە کۆنفرانسی مەڵبەند و مەکتەبەکاندا ٢٦٠ ئەندامی بەشداربووی کۆنگرە لەپرۆسەیەکی دیموکراسیدا دیاریکران، کە ١٧٥ ئەندامیان لە مەڵبەندەکانن و ٨٥ ئەندامیشیان لە مەکتەبەکان بوون، بەمەش ئامادەکارییەکان کۆنگرە هەنگاوێکی دیکە چووە پێشەوە".


" لەگەڵ ئەوەی چەند رۆژێک ماوە بۆ بەستنی پێنجەمین کۆنگرەی یەکێتی، هەوڵ و ئامادەکارییەکان چڕ کراونەتەوە و هەموو هەوڵێکمان بۆ ئەوەیە کۆنگرەیەکی سەرکەوتوو ئەنجام بدەین"، تەلار لەتیف وایوت.

بڕیارە رۆژی چوارشەممە ٢٧-٩-٢٠٢٣ یەکێتیی نیشتمانیی کوردستان پێنجەمین کۆنگرەی خۆی لەسلێمانی، بەبەشداری ٦٠٠ ئەندامی کۆنگرە ببەستێت، کەبۆ یەکەم جارە لەمێژووی خۆیدا پێش وادەی دیاریکراو کۆنگرە ببەستێت.

PUKMEDIA