ساڵیادی کۆچی دوایی شکۆی نیشتمان لە سلێمانی و بەغدا و نەجەف دەکرێتەوە

PUKMEDIA

لۆگۆی دامەزراوەی سەرۆک جەلال تاڵەبانی

بۆ ئەمساڵ، ساڵیادی کۆچی دوایی سەرۆک مام جەلال (شکۆی نیشتمان)، جیاواز لە ساڵانی رابردوو دەکرێتەوە و بڕیارە مەڕاسیمەکە بە دانانی تاجە گوڵینە لە سەر مەزاری مام لە سلێمانی دەستپێبکات و لە نەجەف کۆتایی بێت، ئەمە جگە لەوەی کورتە فیلمێک لەبارەی ژیانی سەرۆک مام جەلال ئامادەکراوە و لە رۆژانی دواتردا نمایش دەکرێت.

باڵیۆز د. محەمەد سابیر سەرۆکی دامەزراوەی سەرۆک جەلال تاڵەبانی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "ئامادەکارییەکانمان بۆ ساڵیادی کۆچی دوایی سەرۆک مام جەلال بەکۆتا گەشتووە و یادەکە لە سلێمانی و بەغدا و نەجەف دەبێت، ئەمە جگە لەوەی لە رۆژی 10ـی ئۆکتۆبەر، کورتە فیلمێک لەبارەی ژیانی سەرۆک مام جەلال لە سلێمانی نمایش دەکرێت".

"رۆژی 3ـی ئۆکتۆبەر کە هاوکاتە لەگەڵ رۆژی کۆچی دوایی سەرۆک مام جەلال، سەرەتای مەراسیمەکە بە دانانی تاجەگوڵینە لەسەر مەزاری مام لە دەباشان دەستپێدەکات کە لەلایەن سکرتارییەتی سەرۆک مام جەلالەوە مەراسیمەکە بەڕێوەدەچێت، پاشانیش هەمان رۆژ  سەعات 4ـی پاشنیوەڕۆ، مەراسیمێکی شایستە لە بەغدا لەژێر چاودێری سەرۆک کۆماری عیراق کە سەرکردە عیراقییەکان بەشدار دەبن و وتاریان دەبێت بەڕێوەدەچێت"، سەرۆکی دامەزراوەی سەرۆک جەلال تاڵەبانی وادەڵێت.

وتیشی: "هەر لە چوارچێوەی ساڵیادی کۆچی دوایی سەرۆک مام جەلال دا، دامەزراوەی سەرۆک جەلال تاڵەبانی و دامەزراوەی بەحر لعلوم، سەعات 11ـی پێشنیوەڕۆی رۆژی 4ـی ئۆکتۆبەر لە نەجەف دیدارێک کە چەند پانێڵیک لەخۆدەگرێت سازدەکەن، تێیدا چەند توێژینەوەیەک لەبارەی سەرۆک مام جەلال دەخرێنەڕوو".

سەرۆک مام جەلال، یەكەم سەرۆك كۆماری عیراق و سكرتێری گشتی یەكێتیی نیشتمایی كوردستان بوو، رۆژی 17-12-2012 بەهۆی تێكچوونی باری تەندروستییەوە لە بەغداوە رەوانەی ئەڵمانیا كرا بەمەبەستی وەرگرتنی چارەسەری پزیشیكی و بەداخەوە رۆژی 3-10-2017، دڵە گەورەكەی لەلێدان كەوت و كۆچیی دوایی كرد.
PUKMEDIA