كۆنفرانسی مەڵبەند و مەكتەبەكان دەستیپێكرد

PUKMEDIA

بەڕێوەچوونی كۆنفرانسی مەڵبەند و مەكتەبەكان

لەپڕۆسەیەكی دیموكراسیدا كۆنفرانسی مەڵبەند و مەكتەبەكان و سەرجەم ئۆرگانەكان لەچوارچێوەی ئامادەكارییەكانی بەستنی پێنجەمین كۆنگرە دەستیپێكرد.

تەلار لەتیف محەمەد وتەبێژی پێنجەمین كۆنگرەی یەكێتیی نیشتمانیی كوردستان بەسایتی رەسمی یەكێتیی نیشتمانیی كوردستان PUKMEDIA ی راگەیاند: "لەچوارچێوەی ئامادەكارییەكانی بەستنی پێنجەمین كۆنگرەی یەكێتیی نیشتمانیی كوردستان كۆنفرانسی مەڵبەندو مەكتەبەكان و سەرجەم ئۆرگانەكان ئەنجامدەدرێت".

"كۆنفرانسەكە لە سەعات 8ی بەیانی بۆ 4ی پاشنیوەڕۆی ئەمڕۆ 21-9-2023، لە پڕۆسەیەكی دیموكراسیدا ئەنجامدەدرێت" تەلار لەتیف وادەڵێت.

ئەمەش لەكاتێكدایە، لەچەند رۆژی رابردوودا لە چوارچێوەی ئامادەكارییەكانی بەستنی پێنجەمین كۆنگرەی یەكێتیی نیشتمانیی كوردستان، لیژنەی دەزگای هەڵبژاردن لە مەكتەب و مەڵبەندەكان دەستبەكار بوون بە مەبەستی كردنەوەی دەرگای خۆپاڵاوتن بۆ ئەو كاندیدانەی كە دەیانەوێت بەشداری كۆنگرە بكەن و هەر هەڤاڵێك ناوی لە تۆماری (مەكتەب و مەڵبەند) هەروەها دەزگای هەڵبژاردندا هەبووبێت، چانسی بەشداریكردنی كۆنگرەی هەبووە.

بڕیارە رۆژی 27ی 9ی 2023 كۆنگرەی پێنجەمی یەكێتی لە سلێمانی ببەسترێت و 600 ئەندام بەشداری تێدادەكەن.


PUKMEDIA