فراکسیۆنی یەکێتی داوای گەڕانەوەی روفاتەکان دەکات

PUKMEDIA

کاروان یاروەیس و سۆزان مەنسور لەگەڵ بۆکسی 171 روفاتی ئەنفالکراوی گەرمیان

بڕیاردەری فراکسیۆنی یەکێتی لە ئەنجومەنی نوێنەران لەگەڵ سەرۆکی داواکاری گشتی سکاڵایەکیان دژی وەزارەتی تەندروستی عیراق و پەیمانگای پزیشکی دادوەری بەغدا تۆمار کرد، بەهۆکاری ئەوەی لەماوەی چوار ساڵدا نەیانتوانیوە پشکنین DNA بۆ روفاتەکانی پزیشکی دادوەری بکات.

کاروان یاروەیس بڕیاردەری فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق بە PUKMEDIA ی راگەیاند: "لەگەڵ دادوەر نەجم عەبدوڵڵا ئەحمەد سەرۆکی داواکاری گشتی سکاڵامان لەسەر وەزارەتی تەندروستی عیراق و پەیمانگای پزیشکی دادوەری بەغدا تۆمار کرد، بەهۆکاری خەمتەرخەمییان لە پشکنینی DNA روفاتەکان".

"ماوەی چوار ساڵە 171 روفاتی ئەنفالکراوانی گەرمیان لە پزیشکی دادی بەغدا ماوەتەوە و بەهۆی ئەنجامنەدانی پشکنینی DNAـو ناسینەوەیان نەتوانراوە بگەڕینرێتەوە هەرێمی کوردستان، لەوچوارچێوەیەشدا بە مافی خۆمان زانیوە سکاڵا تۆمار بکەین بەهۆی جێبەجێ نەکردنی ماددەی (6) بڕگەی (5) یاسای ژمارە (13) ساڵی (2015) کە تایبەتە بە پاراستنی گۆڕەبەکۆمەڵەکانی عیراق و ئەنجامدانی پشکنینی DNA"، کاروان یاروەیس وادەڵێت.
PUKMEDIA