ستران عەبدوڵڵا: لە كۆنگرەدا پرۆگرام و هەیكەلی یەكێتی دادەڕێژرێتەوە

PUKMEDIA

ستران عەبدوڵڵا

ئەندامێکی مەکتەبی سیاسیی یەکێتی لەبارەی پێنجەمین کۆنگرەی یەکێتییەوە دەڵێت: "کۆنگرەی ئەمجارەی یەکێتی هیوا و ئومێد بۆ هاووڵاتییان دەگێڕێتەوە و کۆنگرە پرۆگرام و هەیكەلی حزبەکە دادەڕێژرێتەوە و دەگۆڕێت".

ستران عەبدوڵڵا، ئەندامی مەکتەبی سیاسی یەکێتیی نیشتمانیی کوردستان لە میانی بەشداریکردنی لە دیدارێكی تایبەتی کەناڵی ئاسمانی گەلی کوردستاندا کە بڕیارە ئەمشەو سەعات 7:00 پەخش بكرێت باسی كارەكانی كۆنگرە و گۆڕانكاریی نوێ لە حزبەكەی دەكات و رایگەیاند: "کۆنگرەی ئەمجارەی یەکێتی ئومێد بۆ هاووڵاتییانی کوردستان دەگێڕێتەوە و کاریگەری لەسەر ژیانی هاووڵاتییان دەبێت، پرۆگرام و هەیكەلی حزبەکە دادەڕێژرێتەوە و دەگۆڕێت".

"یەكێتی نیەتی نوێگەری هەیە لەكاردا و لەم كۆنگرەیەدا هەڤاڵان قسەی لەسەردەكەن، بەدیلی یەکێتی هەر یەکێتییە، چونکە لە ماوەی رابردوودا زۆر هێز هاتن و خۆیان تاقیکردەوە و وتیان دەیگۆڕین، بەڵام دواتر واقعی سیاسی دەریخست کە گۆڕانکارییەکان هەر بە یەکێتیی نیشتمانیی کوردستان دەکرێت" ستران عەبدوڵڵا وا دەڵێت.

ئاماژە بەوەشدەکات: "حزبی سیاسی نابێت پاشەکشە بکات لە بڕیاردان، یەکێتیی نیشتمانیی کوردستانیش ئەو بڕیارەی کە دەیدات بەخوێن پارێزگاری لێدەکات، یەکێتی حزبێکە بەردەوام حەزی بە هاوپەیمانێتی و کاری هاوبەشە و خۆی بە بەرپرس دەزانێت و بەردەوام پارێزگاری لە بڕیارەکانی خۆی دەکات". 

ئەندامەکەی مەکتەبی سیاسی باس لەوەش دەکات: "ئەو رووداوانەی لە ماوەی رابردوودا بەسەر یەکێتیدا هات هۆکاربوو بۆئەوەی ژیان و گوزەرانی هاووڵاتیان پاشەکشە بکات، خۆ ئەگەر بە دیدیگای یەکێتیەوە کار بکرابا زیاتر مافەکانی میللەتەکەمان دەستەبەر دەکرا و خواست و ویستی گەلەکەمان بەدیدەهات".

لە بەشێکی تری قسەکانیدا ستران عەبدوڵڵا ئەوەدەخاتەڕوو: "ئەو دروشم و تێگەیشتنانەی یەکێتی، تێگەیشتن و بیرکردنەوەکانی خەڵکی کوردستانە و یەکێتی وەزیفەیەتی  پارێزگارییان لێبکات بەتایبەتی ژیان و گوزەرانی هاووڵاتیان کە لەم قۆناغە و لە داهاتووشدا لە پێشەنگی کارەکانی یەکێتیی نیشتمانیی کوردستانە".

PUKMEDIA