بەپارێزگابوونی هەڵەبجە دەخرێتەوە بەرنامەی کاری پەرلەمان

PUKMEDIA

ئەنجومەنی نوێنەرانی عیراق و مۆنۆمێنتی هەڵەبجە

بەهەوڵی فراکسیۆنە کوردستانییەکان پرۆژەیاسای بەپارێزگابوونی هەڵەبجە خرایەوە کارنامەی دانیشتنی ئەنجومەنی نوێنەرانی عیراق بۆئەوەی خوێندنەوەی سێهەم و کۆتایی بۆ بکرێت.

لەوبارەیەوە چرۆ حەمەشەریف ئەندامی فراکسیۆنی یەکێتی لە ئەنجومەنی نوێنەران لەسەر پشکی هەڵەبجە بە PUKMEDIA ی راگەیاند:" لەگەڵ ئەوەی هەوڵێک هەبوو بۆ ئەوەی پرۆژە یاسای بەپارێزگابوونی هەڵەبجە لەکارنامەی دانیشتنی ئەمڕۆی ئەنجومەنی نوێنەرانی درەبهێنرێت، بەڵام بەهەوڵی فراکسیۆنە کوردستانییەکان پرۆژەکە خرایەوە ناو دانیشتنی ئەنجومەنی نوێنەران".

لەراگەیەنراوی کارنامەی دانیشتنی ئەنجومەنی نوێنەرانی عیراقیشدا ئەوە خراوەتەڕوو، کە پرۆژە یاسای بەپارێزگابوونی هەڵەبجە خراوەتەوە بەرنامەی کار و خوێندنەوەی سێهەم و کۆتایی بۆ دەکرێت.

بڕیاربوو خوێندنەوەی سێهەمی پرۆژە یاسای بەپارێزگابوونی هەڵەبجە رۆژی پێنجشەمەی رابردوو ئەنجامبدرێت، بەڵام بەهۆی چوونی وەفدی هەرێم بۆ بەغدا بەمەبەستی چارەسەری کێشەکانی نێوان هەولێر و بەغدا و سەرقاڵبوونی فراکسیۆنە کوردستانییەکان کەهاوشانی وەفدی هەرێم بوون، ژمارەی یاسایی پەرلەمانتارانی ئامادەبوو تەواونەبوو بۆیە دانیشتنەکە بۆ ئەمڕۆ دواخرا.

یەکێتیی نیشتمانیی کوردستان خۆی بە خاوەنی پرۆژەکە دەزانێت، هاوکات سەرۆک بافڵ لەسەرەتای پێکهێنانی حکومەتی نوێی عیراق کۆمەڵێک داواکاری پێشکەشی محەمەد شیاع سودانی سەرۆکوەزیرانی عیراق کرد، کە یەکێک لەداواکارییەکان تەواوکردنی رێکارەکانی پرسی بەپارێزگابوونی هەڵەبجە بوو، لەوچوارچێوەیەشدا فراکسیۆنی یەکێتی هەوڵەکانی خستەگەڕ و بۆ ئەو مەبەستەش چەند جارێک داوای لەسەرۆکایەتی پەرلەمان کردووە کە پرسی بەپاریزگا بوونی هەڵەبجە تەواوبکرێت، بۆئەمەش هەوڵی دروستکردنی کۆدەنگی لەناو پەرلەمان بۆ پرۆژەکە داوە.

PUKMEDIA