مەکتەبی سیاسی: ئەولەویەتی ئەم قۆناغە بۆ ژیانی هاووڵاتییان بێت

PUKMEDIA

مەکتەبی سیاسی یەکێتی بەسەرۆکایەتی بافڵ جەلال تاڵەبانی کۆبوەوە

ئەمڕۆ شەممە ١٦ ی ٩ ی ٢٠٢٣ بە سەرپەرشتی هەڤاڵ بافڵ جەلال تاڵەبانی سەرۆکی یەکێتیی نیشتمانیی کوردستان مەکتەبی سیاسی کۆبۆوە .

کۆبوونەوەکە کە لە دەباشان بەڕێوەچوو ، گفتوگۆی تێروتەسەلی کرد لەسەر دوا پێشهاتەکانی کوردستان و عیراق و ناوچەکە، بە تایبەت پرسی مووچەو گوزەرانی هاووڵاتیان کوردستان و دوا کۆششەکانی وەفدی حکومەتی هەرێمی کوردستان لە سەردانیکردنی بەغداو دیدارەکانی لەگەڵ حکومەت و لایەنە سیاسیەکانی عیراقدا.

مەکتەبی سیاسی لەسەر ئەم پرسە هەڵوەستەی کردو تەئکیدیکردەوە ئەولەویەتی ئەم قۆناغە دەبێت بۆ مووچەو ژیانی هاوڵاتیان بێت، بۆ ئەم مەبەستەش گرنگە رۆڵ و هەوڵەکانی یەکێتی لە حکومەتی هەرێم و بەغدا بەو ئاڕاستەیە بێت.

بەشێکی تری کۆبوونەوەکە تایبەت بوو بە تاوتوێکردنی سەردانی وەفدی یەکێتی بە سەرۆکایەتی سەرۆک بافڵ جەلال تاڵەبانی بۆ کۆماری ئیسلامی ئێران و دیدارەکانی بۆ پێشخستنی پەیوەندی دۆستانەی نێوان هەرێمی کوردستان و عیراق لەگەڵ کۆماری ئیسلامی ئێران، سەرئەنجام کۆبوونەوە سەردانەکە و پەیوەندییە هەرێمایەتی و نێودەوڵەتییەکانی یەکێتی لەو نێوەندەدا بە ئیجابی و بنیادنەرانە هەڵسەنگاند لە بەرژەوەندی کوردستان و عیراق .

هەر لەمیانی بەڕێوەچوونی کۆبوونەوەی مەکتەبی سیاسیدا لەسەر دوا ئامادەکارییەکانی کۆنگرەی پێنجەمی یەکێتیی نیشتمانیی کوردستان گفتوگۆکراو دووپات لەسەر پەسەندکردنی رێوشوێنە پەیڕەوکراوەکان بەرەوە کۆنگرەیەکی سەرکەوتووی یەکێتیانە لە ٢٧ ی ٩ ی ٢٠٢٣ کرایەوە .

PUKMEDIA