ئەندامێکی سەرکردایەتی: یەکێتی خۆی بەخاوەنی کەرکوک دەزانێت

PUKMEDIA

شاری کەرکوک

ئەندامێکی سەرکردایەتی یەکێتیی نیشتمانیی کوردستان لە روونکردنەوەیەکدا وەڵامی شاخەوان عەبدوڵڵا جێگری دووەمی سەرۆکی ئەنجومەنی نوێنەران دەداتەوە، لەبەرامبەر بەشداریکردنی لەدیمانەیەکدا کە تێیدا وتویەتی:"توانیمان هەموو هەمەڕ و ئۆتۆمبێلە سەربازییەکان لە نێو گەڕەکە کوردییەکانی کەرکوک بکشێنینەوە".

ئاڤێستا شێخ محەمەد ئەندامی سەرکردایەتی یەکێتیی نیشتمانیی کوردستان لە وەڵامەکەیدا بۆ شاخەوان عەبدوڵڵا دەڵێت:" بەڕێز کاک شاخەوان دیارە جەنابتان بێخەبەرن لە دۆخی ناو شاری کەرکوک، بۆیە دەمانەوێت بیرتان بهێنینەوە کە ئەوە راپۆرتی یەکێتیی نیشتیمانیی کوردستان بوو لە کۆبوونەوەی هاوپەیمانی ئیدارەی دەوڵەتدا کە ئاسۆ مامەند و خالید شوانی پێشکەشیان کرد و بووە دەستپێکی گرتنەبەری رێکاری کشانەوە و چۆڵکردنی هێزی سەربازی لە نێو شاری کەرکوکدا".

 "وادیارە بیرتان چووەتەوە یاخود لە بیر خۆتانی دەبەنەوە پرسی تەسلیمکردنەوەی بارەگای حزبەکەی بەڕێزتان رێگەخۆشکەربوو بۆ هاتنەناوەوەی هێزە سەربازییەکان بۆ گەڕەکەکان، لەو کاتەشدا هەر یەکێتیی نیشتیمانیی کوردستان بوو دەیویست رێگەبگرێت لە رشتنی خوێن و چارەسەری هاتنەناوەوەی سوپا"، ئاڤێستا شێخ محەمەد وایوت.

هەر لە رونکردنەوەکەدا ئاماژەی بەوەشکردووە:"سەرۆکایەتی و سەرکردایەتی یەکێتیی نیشتیمانیی کوردستان هەر لە سەرەتاوە  لە هەوڵی جدیدا بوون بۆ هێوەرکردنەوەی دۆخەکە و بە لاڕێدانەبردنی چونکە یەکێتیی خۆی بە خاوەنی پارێزگای کەرکوک و رۆڵەی شارەکە دەزانێت و هەوڵەکانی گەواهیدەری ئەم راستیەن و خەڵکی بەشەرەفی کەرکوک زۆر لەوە هۆشیارترن کە بە بانگەشەیەکی بێبنەما فریو بخۆن، چونکە کورد وتەنی (لە بێـــــخــەبەران کەشــــکەک سەڵاوات )".

PUKMEDIA