لەسەر داوای یەکێتی وەفدێکی هاوپەیمانی بەڕێوەبردنی دەوڵەت دێتە کەرکوک

PUKMEDIA

کۆبوونەوەی هاوپەیمانێتی بەڕێوەبردنی دەوڵەت

لەسەر داوای یەکێتی، وەفدێکی هاوپەیمانێتی بەڕێوەبردنی دەوڵەت سەردانی کەرکوک دەکات و لەو رووداوانە دەکۆڵێتەوە کە لە چەند رۆژی رابردوودا لە شارەکە روویاندا و بەهۆیەوە چوار گەنج شەهیدبوون و ١٥ کەسی دیکەش برینداربوون، ئەمەش لەکاتێکدایە پێشتریش هەر لەسەر داوای یەکێتی، سەرۆک وەزیرانی عیراق بڕیاریدا ئەو گەنجانەی لەو رووداوانەدا بوونە قوربانی وەک شەهید ناوەکانیان تۆمار بکرێت و مامەڵەیان بۆبکرێت.

ئاسۆ مامەند کارگێڕی مەکتەبی سیاسی یەکێتیی نیشتمانیی کوردستان لە چاوپێکەوتنێکی تایبەتدا لە کەناڵێ کوردسات نیوز رایگەیاند: "وەک نوێنەری یەکێتی بەشداربووین لە کۆبوونەوەی هاوپەیمانێتی بەڕێوەبردنی دەوڵەت کە بە ئامادەبوونی هەر سێ سەرۆکایەتییەکەی عیراق بەڕێوەچوو، لە کۆبوونەوەکەدا وەک یەکێتی راپۆرتێکمان لەبارەی دۆخی کەرکوکەوە پێشکەش بە هاوپەیمانێتی بەڕێوەبردنی دەوڵەت کرد و ئەوانیش لەسەر داوای ئێمە بڕیاریاندا رۆژی دووشەممە، وەفدێک بۆ لێکۆڵینەوە لە رووداوە نەخوازراوەکەی چەند رۆژی رابردووی کەرکوک بنێرنە شارەکە".

"هەر لە راپۆرتەکەماندا تەئکیدمان کردەوە کە پێویستە ئەوکەسانەی تێوەگلاون لە شەهیدکردن و برینداربوونی گەنجانی شارەکە رووبەڕووی یاسا بکرێنەوە و لێپرسینەوەیان لەگەڵدا بکرێت، هەروەها ئاماژەمان بەوەشدا کە کورد لە پۆستە ئیداری و ئەمنییەکانی شارەکە مافی خۆی پێنەدراوە و پێویستە ئەو مافانەی بۆبگەڕێتەوە"، ئاسۆ مامەند وادەڵێت.

دەشڵێت: "داواشمان کرد هێزێکی ئەمنی لە پێکهاتەکانی کەرکوک دروستبکرێت کە تەنها ئەرکیان پاراستنی شارەکە بێت، ئەمەش لەپێناو ئەوەی هەموو پێکهاتەکانی شارەکە ئەو هێزە بە هی خۆیان بزانن و ئاسودەبن لەگەڵیاندا".

ئەو گرژیی و ئاڵۆزییانەی ماوەی رابردووی كەركوك کە لەسەر بارەگایەكی پارتی و ناكۆكی سیاسی سەریهەڵدا، تەوەرێكی سەرەكی كۆبوونەوەكەی هاوپەیمانی بەڕێوەبردنی دەوڵەت بوو، كە شەوی رابردوو بە ئامادەبوونی هەر سێ  سەرۆکایەتییەکی عیراق بەڕێوەچوو، تێیدا نوێنەرانی یەكێتیی نیشتمانیی كوردستان راپۆرتێکیان پێشکەش کرد و تەئکیدیان لە ئارامی شاری کەرکوک کردەوە.
PUKMEDIA