ئاسۆ مامەند: جگە لەپارتی لایەنە کوردستانییەکانی کەرکوک هاوهەڵوێستن

PUKMEDIA

ئاسۆ مامەند

کارگێڕێکی مەکتەبی سیاسی لەبارەی کەرکوک و دوایین پێشهاتەکانی دوای خۆپیشاندان و ئاڵۆزیی، دەڵێت: "سەرۆک بافڵ چەندین جار ویستی سەردانی کەرکوک بکات و ئێمە دڵنیاییمان پێداوە بۆ چارەسەری کێشەکان، هاوکات جێی داخە کە جگە لە پارتی دیموکراتی کوردستان هەموو لایەنە کوردستانییەکان لە کەرکوک هاوهەڵوێستن".

ئاسۆ مامەند کارگێڕی مەکتەبی سیاسی یەکێتیی نیشتمانیی کوردستان بە کەناڵی ئاسمانی گەلی کوردستانی راگەیاند: "ئەم دۆخە ئاڵۆزەی ئێستا لە کەرکوک هەیە خزمەت بە کورد و شارەکە ناکات، بەڵام ئێمە خەڵکی خۆڕاگری کەرکوک دڵنیا دەکەینەوە، یەکێتی کەرکوکییەکان بە تەنها جێناهێڵێت و دڵۆپێک خوێنی گەنجانی کەرکوک لەهەموو پۆستی شارەکە گرنگترە و نامانەوێت موزایەدە بە خوێنی گەنجانەوە بکرێت".

"بەداخەوە، جگە لە پارتی تەواوی لایەنە کوردستانییەکان لە کەرکوک یەک هەڵوێستن، بۆیە پێیان دەڵێین داواکارییەکانی کورد لە بەغدا جێبەجێ دەکرێن نەک لە شۆڕیجە و رەحیماوا، بۆیە داوا لە پارتی و لایەنەکانی تریش دەکەین پێکەوە کار بۆ چارەسەری کێشەکانی کەرکوک بکەین"، ئاسۆ مامەند وای وت.

کارگێڕەکەی مەکتەبی سیاسی دەشڵێت: "لە یەکەم شەوی رووداوەکانی کەرکوک سەرۆک بافڵ جەلال تاڵەبانی 5 جار پەیوەندی پێوەکردووین بۆ سەردانکردنی کەرکوک بەڵام دڵنیاییمان پێدا کێشەکان چارەسەر دەکەین، رونیشە کە هەمووکات یەکێتی سیاسەتێکی راست و درووستی بۆ خزمەتی کەرکوکییەکان پەیڕەو کردووە".

PUKMEDIA