سه‌عدی پیره‌: سه‌رپه‌رشتیارانی خۆپیشاندانه‌كه‌ی كه‌ركوك له‌هه‌ولێر ده‌ژین

PUKMEDIA

سەعدی ئەحمەد پیرە

پارتی بۆ تێكچوونی بارودۆخی ئارامی كه‌ركوك هه‌وڵه‌كانی چڕكردوه‌ته‌وه‌و ئه‌جندانی سیاسی خۆی تێكه‌ڵ به‌ داواكاری ره‌وای خه‌ڵكی كه‌ركوك كردوه‌، ئه‌ندامێكی مه‌كته‌بی سیاسی یه‌كێتیی نیشتمانیی كوردستان رایده‌گه‌ینێت: "به‌شێكی زۆر له‌و كه‌سانه‌ی سه‌رپه‌رشتی خۆپیشاندانه‌كانی كه‌ركوك ده‌كه‌ن له‌هه‌ولێر ده‌ژین و هاوپه‌یمانێتییان له‌گه‌ڵ لایه‌نێكی كوردستانی هه‌یه‌".

لایەنە داخ لە دڵەکان بەپێی بەرنامە و پیلان کێشە لە کەرکوک دروست دەکەن

سه‌عدی ئه‌حمه‌د پیره‌ ئه‌ندامی مه‌كته‌بی سیاسی یه‌كێتیی نیشتمانیی كوردستان له‌میانی به‌شداریكردنی له‌گه‌شتی هه‌واڵی كه‌ناڵی كوردساتدا رایگه‌یاند: "ده‌مێكه‌ زۆرێك له‌و لایه‌نه‌ داخ له‌دڵانه‌ی كه‌ ئێستا كێشه‌ له‌ كه‌ركوك دروستده‌كه‌ن به‌پێی به‌رنامه‌و پیلان به‌نیازی بنكۆڵكردنی شاره‌كه‌ن، كه‌ ره‌نگه‌ ده‌ستی وڵاتانی هه‌رێمیشیی تێدا بێت، چونكه‌ كه‌ركوك له‌به‌رده‌م هه‌ڵبژاردنی ئه‌نجومه‌نی پارێزگادایه‌".

"هه‌موو لایه‌نێكی سیاسی به‌پێی یاسای هه‌ڵبژاردن بۆی هه‌یه‌ له‌شاره‌كه‌دا به‌شداری هه‌ڵبژاردن بكات، ئه‌گه‌ر مه‌به‌ستیان كێشه‌ نانه‌وه‌ نه‌بێت له‌كه‌ركوك ئیتر بۆچی ده‌یانه‌وێت باره‌گایان هه‌بێت یاخود بگەڕێنەوە‌، ئه‌مه‌ جگه‌ له‌ئه‌وه‌ی به‌پێی به‌دواچوونه‌كانمان به‌شێكی زۆر له‌و كه‌سانه‌ی سه‌رپه‌رشتی خۆپیشاندانانه‌كانی كه‌ركوك ده‌كه‌ن له‌هه‌ولێر ده‌ژین و هاوپه‌یمانێتییان له‌گه‌ڵ لایه‌نێكی كوردستانیی هه‌یه‌"، پیره‌ وایوت.

یەکێتی بەوپەڕی به‌رپرسیاریه‌تیه‌وه‌ مامه‌ڵه‌ی كردووه‌

سه‌عدی ئه‌حمه‌د پیره‌ وتیشی: "ئه‌و كێشانه‌ی له‌كه‌ركوك رویاندا له‌ئه‌نجامی كه‌مته‌رخه‌می و به‌رپرسیارێتی هه‌ندێك لایه‌ن بوو، كه‌ نه‌توانرا لیستێكی كوردی هاوبه‌ش بۆ هه‌ڵبژاردنی ئه‌نجومه‌نی پارێزگاكان دروستبكرێت".

ئاماژه‌ی بۆ ئه‌وه‌شكرد:" یه‌كێتیی نیشتمانیی كوردستان له‌ ئاستی سه‌ربازی و سیاسی دا به‌وپه‌ڕ‌ی به‌رپرسیاریه‌تیه‌وه‌ مامه‌ڵه‌ی كردووه‌ و هه‌وڵیشده‌دات تا توانای هه‌بێت ژینگه‌یه‌كی سیاسی بۆ كۆتایی هێنان به‌م كێشه‌یه‌ دروستبكات، روونیشه‌ ئه‌وانه‌شی ده‌یانه‌وێت سوود له‌كه‌ركوك و داهاته‌كه‌ی وه‌ربگرن، خوازیاری بوونی كه‌شێكی ئنائارام و ئاڵۆزن، ئه‌مه‌ش په‌رۆشنه‌بوونی ئه‌و لایه‌نه‌ بۆ كه‌ركوك ده‌رده‌خات".
PUKMEDIA