یەکێتی لەبارەی داخستنی رێگە و خۆپیشاندان لە کەرکوک هاتەدەنگ

PUKMEDIA

لۆگۆی یەکێتی

فراكسیۆنی یەكێتی نیشمانی كوردستان لە پەرلەمانی عیراق، پەیامێک ئاڕاستەی سێ سەرۆکایەتییەکی عیراق دەکات و رایدەگەیەنێت، "ئێمە لە فراكسیۆنی یەكێتیی نیشمانیی كوردستان لە پەرلەمانی عیراق وێڕای ئەوەی دژی داخستنی رێگایی سەرەكی كەركوك -هەولێرین كە بارگرانی زۆری بۆ هاوڵاتییان دروست کردوە، داواتان لێدەكەین رێکاری بەپەلە بگرنەبەر بۆ ئاساییکردنەوەی دۆخی کەرکوک"، "لەسەر خەتین و هەموو جۆرە رێکارێکی یاسایی دەگرینەبەر بۆ سزادانی هەر کەس و لایەنێک کە بیەوێت بە ئاڵۆزکردنی دۆخی کەرکوک لە ئاوی لێل ماسی بگرێت".

دەقی راگەیەندراوەکەی فراكسیۆنی یەكێتی نیشمانی كوردستان لە پەرلەمانی عیراق


بەرێز سەرۆك كۆماری عێراق
بەرێز سەرۆكی ئەنجومەنی وەزیرانی عێراق
بەرێزسەرۆكی ئەنجومەنی نوێنەرانی عێرق

بەڕێزان پاش داخستنی رێگایی سەرەكی كەركوك-هەولێر لەلایەن ژمارەیەك خۆپیشاندەر دژ چۆڵكردنی بینایی فەرماندەیی هێزە هاوبەشەكانی عێراق لە كەركوك و تەسلیمكردنەوەی بە پارتی دیموكراتی كوردستان، كەركوك بە باردۆخێكی ناجێگر تێدەپەڕێت.

ئێمە لە فراكسیۆنی یەكێتی نیشمانی كوردستان لە پەرلەمانی عێراق وێڕای ئەوەی دژی داخستنی رێگایی سەرەكی كەركوك -هەولێرین كە بارگرانی زۆری بۆ هاوڵاتییان دروست کردوە، داواتان لێدەكەین رێکاری بەپەلە بگرنەبەر بۆ ئاساییکردنەوەی دۆخی کەرکوک.

لە هەمان کاتیشدا داوا لە هاوڵاتییانی شاری کەرکوک لە هەموو پێکهاتەکان دەکەین، دان بە خۆیاندا بگرن و رێگە مەدەن لەپێناو مەرامی سیاسی هەندێک لایەن سەقامگیری کەرکوک و پێکەوەژیانی ئاشتییانە لە شارەکە بکەوێتە مەترسییەوە.

وەک فراکسیۆنی یەکێتی نیشتمانی کوردستان لەسەر خەتین و هەموو جۆرە رێکارێکی یاسایی دەگرینەبەر بۆ سزادانی هەر کەس و لایەنێک کە بیەوێت بە ئاڵۆزکردنی دۆخی کەرکوک لە ئاوی لێل ماسی بگرێت.

فراكسیۆنی یەكێتی نیشمانی كوردستان لە پەرلەمانی عێراق