قوباد تاڵەبانی و مارك سترۆ: ئازادی رۆژنامەگەری لە هەرێم پاشەكشە نەكات

نووسینگەی قوباد تاڵەبانی

قوباد تاڵەبانی و مارك سترۆ

قوباد تاڵەبانی جێگری سەرۆكوەزیران پێشوازی لە مارك سترۆ كونسوڵی گشتی نوێی ئەمریكا لە هەرێم كرد و لە كۆبوونەوەی نێوانیاندا چەند بابەتی جێگەی بایەخی هەردوولا تاوتوێ كران.

لە كۆبوونەوەكەدا كە رۆژی 23-8-2023، لە هەولێر بەڕێوەچوو و تیایدا دابان شەدەڵە جێگری سەرۆكی فەرمانگەی پەیوەندییەكانی دەرەوەی هەرێم ئامادەی بوو، قوباد تاڵەبانی بەبۆنەی دەستبەكاربوونییەوە وەك كونسوڵی نوێی ئەمریكا لە هەرێم، پیرۆزبایی لە مارك سترۆ كرد و هیوای خواست لە ماوەی ئەركەكەیدا پەیوەندییەكانی نێوان هەرێم و ئەمریكا بەرەوپێشچوونی زیاتر بەخۆیەوە ببینێت.

لە تەوەرێكی كۆبوونەوەكەدا باسی دۆخی ئازادی رادەربڕین و بواری رۆژنامەگەری لە هەرێمی كوردستان و عیراق كرا و هەردوولا هاوڕابوون كە نەك هەر نابێت هەرێم لەرووی ئازادی رادەربڕین و بواری رۆژنامەگەرییەوە پاشەكشە بكات، بەڵكو دەبێت پەیوەندییەكی تەندروست و پیشەییانەتر لەنێوان دەسەڵاتی سیاسی و میدیادا هەبێت و پەرەی پێبدرێت.

لە بەشێكی دیكەی كۆبوونەوەكەدا باسی دۆخی چالاكوانان و رێكخراوەكانی كۆمەڵگای مەدەنی كرا، لەمبارەیەشەوە جەختكرایەوە لەسەر پێویستی هاوكاریكردنی زیاتری رێكخراوەكانی كۆمەڵگای مەدەنی لە هەموو شار و شارۆچكەكانی هەرێم.

لە تەوەرێكی دیكەدا گفتوگۆ لەسەر چاكسازییەكانی وەزارەتی پێشمەرگە كرا و لەمبارەیەشەوە قوباد تاڵەبانی جەختی كردەوە لەسەر پێویستیی بەردەوامبوونی پڕۆسەی چاكسازی و دوورخستنەوەی وەزارەتەكە لە ناكۆكی و ململانێ سیاسییەكان.


PUKMEDIA