لەسلێمانی و هەڵەبجە و هەولێر داوای ئازادکردنی زیندانیانی بادینان دەکرێت

PUKMEDIA

باجی ئازادی لە هەولێر و دهۆك كوشتن و زیندانییە

رۆژنامەنووس و چالاکوانانی سلێمانی و هەڵەبجە وهەولێر دژی سزادانی شێروان شێروانی و ئازادنەکردنی گوهدار زێباری گردبوونەوە، بەڵام لەدهۆک لەلایەن هێزە ئەمنییەکانەوە رێگری لەڕۆژنامەنووس و کەسوکاری زیندانیان کراو رێگەیان نەدا بەیاننامەکەیان پێشکەشبکەن.

رۆژنامەنووس و چالاکوانانی سلێمانی و هەڵەبجە وهەولێر لەبەیاننامەکەیاندا رایانگەیاند:" لەسەرەتای دەستبەکاربوونی کابینەی نۆیەمەوە سەرەڕای بەڵێنەکانی چاکسازی و فراوانکردنی پانتایی ئازادیی رادەربڕین، بەڵام بەداخەوە بەشێوەیەکی بەرچاو رووی لەپاشەکشە کردووە و چیتر قبوڵناکرێت".

نوێنەری رۆژنامەنووس و چالاکوانان لە کۆنگرە رۆژنامەوانییەکانیاندا رایانگەیاند:"هیوادارین دەسەڵاتدارانی هەرێم چاوبکەنەوە و ئەو خەتەسوور و قوربانیدانانە ببینن، کە خەڵکی ئازادیخوازی باشوری کوردستان بەدرێژایی سەد ساڵی رابردوو لەپێناو ئازادی و نان داویانە، گوێ لەدەنگی بەرزی نوێنەری نەتەوە یەکگرتووەکان و وڵاتانی دەرەوەی دراوسێ و راپۆرتی رێکخراو و دامەزراوە جیهانییەکان بگرن، کە تەنها ٤٠ ساڵ لەمەوبەر و هەمان دۆستانی ئێستا بەشێک لەڕاپۆرتەکانیان لەسەر ئەندامانی زیندانی ئەو حزبانە بوو کە ئێستا بەرپرسن لەم دۆخە".

راشیانگەیاند:"سزادانی شێروان شێروانی و ئازادنەکردنی گوهدار زێباری نوێترین زنجیرەی خراپ بەکارهێنانی یاسایە دژی رۆژنامەنووس و چالاکوانان بەجۆرێک دەستوەردانی سیاسی بە روونی لەم کەیسانەدا دیارە".

هەر لەبایاننامەکەدا داوایانکرد:" دادگای پیداچوونەوە ئەو پێشێلکارییە یاساییانە راستبکاتەوە، بۆئەوەی بێ متمانەیی خەڵک بە دادگاکان قوڵتر نەبێتەوە و چیتر سیمای کوردستان لەکۆمەڵگەی نێودەوڵەتی ناشرینتر نەبێت".

PUKMEDIA