پاراستنی پارتی لە دەروازەی سێمالكا هەڤاڵێكی یەكێتی دەستگیر دەكات

PUKMEDIA

حەسەن عەلی

هەڤاڵێكی یەكێتی بەناوی حەسەن عەلی لەدایكبووی 1999 كە شوفێری بارهەڵگرە، لە لایەن ئاسایشی پارتییەوە دەستگیر دەكرێت و تۆمەتی هاوكاریكردنی پەكەكە و هەسەدە دەدرێتە پاڵی، خوشكێكیشی دەڵێت: "یەكەمجار نییە پاراستن و ئاسایشی پارتی بە تۆمەتی هاوكاریكردنی پەكەكە هەڤاڵانی یەكێتی لەو ناوچانە دەستگیر دەكەن".


لەوبارەیەوە شیلان عەلی نەمر خوشكی حەسەن عەلی و ئەندامی كۆمیتەی بەردیەی سەر بە مەڵبەندی موسڵی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "رۆژی 13-8-2023، حەسەن عەلی كە لەدایكبووی ساڵی 1999 و شوفێری بارهەڵگرە، لە رێگەی رۆژئاوا و باشوور بار دەگوازێتەوە، لە سێمالكا لەسەر سنووری رۆژئاوا لە لایەن ئاسایشی پارتییەوە دەستگیر كرا و تۆمەتی هاوكاریكردنی پەكەكە و هەسەدەیان داوەتە پاڵی".

"ئاسایشی سێمالكا لەسەر سنووری رۆژئاوا رایگەیاندووە، پاراستن لە هەولێرەوە داوای دەستگیركردنی حەسەن عەلی-یان كردووە و تۆمەتی هاوكاریكردنی پەكەكە و هەسەدەیان داوەتە پاڵی" شیلان عەلی نەمر وادەڵێت.

راشیگەیاند: "هەموو خێزانەكەمان یەكێتین، ئەمە یەكەمجاریش نییە پاراستن و ئاسایشی پارتی بە تۆمەتی هاوكاریكردنی پەكەكە هەڤاڵانی یەكێتی لە ناوچەكانی بادینان و نەینەوا و برادۆست و سۆران دەستگیر دەكەن".


PUKMEDIA