رێكخراوی CPT: له‌ئه‌مساڵدا توركیا 82 هێرشی درۆنی بۆ سه‌ر هه‌رێم ئه‌نجامداوه‌

PUKMEDIA

کامەران عوسمان

كامه‌ران عوسمان ئه‌ندامی تیمی كوردستانی عیراقی رێكخراوی (CPT)ـیی ئه‌مریكی له‌چاوپێكه‌وتنێكدا له‌گه‌ڵ سایتی ره‌سمیی یه‌كێتیی نیشتمانیی كوردستان PUKMEDIA سه‌باره‌ت به‌ نوێترین ئاماری بۆردومان و قوربانییه‌كانی هێرشه‌ ئاسمانی و تۆپبارانی گونده‌كانی هه‌رێمی كوردستان له‌لایه‌ن توركیاوه‌ رایگه‌یاند:" له‌بۆردومانه‌كانی توركیادا زۆرترین هاووڵاتی سڤیل كوژراون و 158 گوندیش چۆڵكراون، ئه‌مه‌ جگه‌ له‌ئه‌وه‌ی ته‌نها له‌ئه‌مساڵدا 82 شوێنی هه‌رێمی كوردستان كراونه‌ته‌ ئامانجی درۆنه‌كانی توركیا".

ده‌قی چاوپێكه‌وتنه‌كه‌ ...


* قوربانییه‌كانی هێرشه‌كانی توركیا زیاتر كێن؟

"ئه‌و درۆنه‌ی كه‌ توركیا به‌كاریده‌هێنێت سه‌ره‌تا درۆنی بایرێكته‌ربیتوو بوو ئێستاش درۆنی ئاكنجی به‌كارده‌هێنێت، له‌و هێرشه‌ ئاسمانییانه‌دا زۆربه‌ی هاووڵاتی سڤیل ده‌بنه‌ قوربانی، به‌جۆرێك ئه‌وه‌نده‌ی هاووڵاتی سڤیل ده‌بنه‌ قوربانی ئه‌وه‌نده‌ ئه‌ندامانی پارتی كرێكاران نابنه‌ قوربانی، به‌پێی ئه‌و ئامارانه‌ی له‌به‌رده‌ستماندایه‌ ١٤٧ هاووڵاتی سڤیل به‌و هۆیه‌وه‌ كوژراون، هاوكات به‌وردی شیكاری ئه‌وه‌مان كردووه‌، كه‌ ئه‌ندامانی پارتی كرێكاران به‌هۆی تۆپبارانه‌وه‌ كوژراون، به‌ڵام به‌هۆی فڕۆكه‌وه‌ ئه‌وه‌نده‌ی هاووڵاتی مه‌ده‌نی كراونه‌ته‌ ئامانج ئه‌وه‌نده‌ ئه‌ندامانی پارتی كرێكاران نه‌كراونه‌ته‌ ئامانج".

"درۆنی توركی له‌ مانگی ٨ی ساڵی ٢٠١٥ه‌وه‌ به‌كاردێت له‌وكاته‌وه‌ تاوه‌كو ئێستا به‌ بۆردومانی ئاسمانی و تۆپباران و ته‌قه‌كردنی ناو گونده‌كانه‌وه‌ ١٤٧ هاووڵاتی سڤیل كوژراون و ٢١٩ هاووڵاتی سڤیلیش بریندار بوون، زۆربه‌شیان قوربانی درۆنین".


*ژماره‌ی ئه‌و گوندانه‌ی كه‌ به‌هۆی بۆردومانه‌كانی توركیاوه‌ چۆڵكراون كامانه‌ن؟

"تا ئێستا ١٥٨ گوند به‌هۆی هێرشه‌كانی توركیاوه‌ به‌ ته‌واوی چۆڵكراون كه‌ زۆرینه‌ی به‌ر گونده‌كانی ناوچه‌ی سیده‌كان له‌ پاریزگای هه‌ولێر و و زاپ و ئاڤاشین له‌ پارێزگای دهۆك ده‌كه‌ون، هاوكات چه‌ند گوندێكی زاخۆ و گونده‌ چۆڵكراوه‌كانی پارێزگای سلێمانیش به‌وهۆیه‌وه‌ چه‌ند گوندیكی كه‌من كه‌ چۆڵكراون، به‌ڵام به‌ گشتی ده‌كرێت بڵێین ٪٥٩ قوربانییه‌كان به‌هۆی بۆردومانه‌وه‌ له‌ پارێزگای دهۆكن".

*ژماره‌ی سه‌ربازگه‌كانی توركیا له‌هه‌رێم چه‌ندن؟
"توركیا ٦٤ بنكه‌ و باره‌گای سه‌ربازی له‌هه‌رێم هه‌یه‌ كه‌ ده‌كه‌ونه‌ پارێزگاكانی هه‌ولێر و دهۆكه‌وه‌".

*ژماره‌ی بۆردومانه‌كانی ئه‌مساڵ له‌لایه‌ن توركیاوه‌ چه‌ندن؟
له‌ئه‌مساڵدا ٨٢ شوێن له‌هه‌رێمی كوردستان له‌لایه‌ن درۆنه‌كانی توركیاوه‌ به‌ئامانج گیراون.

* هیچ راپۆرتێكتان داوه‌ته‌ ناوه‌نده‌ نێوده‌وڵه‌تییه‌كان؟
*"به‌ڵێ راپۆرته‌كانمان پێشكه‌ش به‌ كۆنسوڵخانه‌ی وڵاتان له‌هه‌رێمی كوردستان كردوه‌و ئاگادارمان كردونه‌ته‌وه‌".

*به‌پێی راپۆرت و ئاماره‌كان بۆتان ده‌ركه‌وتووه‌ كه‌ كێ چاوساخ و هاوكارییانه‌؟
"ده‌توانم به‌ ئاسانی بڵێم هیچ كه‌سێك له‌هه‌رێم و عیراق رێگریی له‌ توركیا ناكات و  له‌عیراق كاتێك بۆردومانده‌كرێت پاسه‌وانی سنوری عیراقی به‌ ماتۆڕ راده‌كه‌ن، كاتێك له‌ساڵی ٢٠٢١ بۆردومانی خه‌سته‌خانه‌ی گوندی ته‌فرا كرا خه‌ڵكه‌كه‌ داوای هاوكاری لێره‌ ده‌كرد، بۆیه‌ من وه‌ڵامه‌كه‌ به‌شێوازێكی دیكه‌ وه‌ڵام ده‌ده‌مه‌وه‌ كه‌ باس له‌وه‌ ده‌كه‌م، رێگریی نیه‌ له‌توركیا بۆیه‌ هه‌ر رۆژه‌و ناوچه‌یه‌كمان ده‌كه‌نه‌ ئامانجه‌كانیان". 

PUKMEDIA