سەرۆک بافڵ: رێگە بەدووبارە قوربانی دانی خەڵکی کوردستان نادەین

نوسینگەی رۆژنامەوانی سەرۆکی یەکێتی

سەرۆکی یەکێتی و ئەمینداری گشتیی بزووتنەوەی عەسائیب ئەھلی حەق

بافڵ جەلال تاڵەبانی، سەرۆکی یەکێتیی نیشتمانیی کوردستان لەبەغدا چاویکەوت بە قەیس خەزعەلی، ئەمینداری گشتیی بزووتنەوەی عەسائیب ئەھلی حەق.

‌‎لەدیدارێكدا دۆخی گشتیی وڵات و هەوڵەكان بۆ جێبەجێكردنی كارنامەی حكومەت گفتوگۆی لەبارەوەكرا و جەخت لە هەماهەنگی و هاریكاریی نێوان هێز و لایەنە سیاسییەكان كرایەوە لەپێناو بەدیهێنانی بەرژەوەندییە باڵا و نیشتمانییەكان.

‌‎لە بەشێكیتری دیدارەكەدا جەخت لە گەڕانەوە بۆ دەستوور وەك بنەمای چارەسەری كێشەكان كرایەوە و هەردوولا هاوڕابوون بەزووترین كات كێشەكانی نێوان هەولێر و بەغدا چارەسەربكرێن و ناكۆكییە سیاسییەكان كاریگەریی نەرێنی لەسەر گوزەرانی هاوڵاتییان و قووتی مووچەخۆران جێنەهێڵێت.

‌‎سەرۆك بافڵ جەلال تاڵەبانی ئاماژەی بە هەوڵەكانی یەكێتی كرد لەپێناو بەدەستهێنانی ماف و شایستەداراییەكانی هەرێم و رایگەیاند، بەردەوامیی كێشەكان خزمەت بەهیچ لایەك ناكات و هەموو هەوڵەكانمان لەپێناو تێپەڕاندنی ئەو دۆخە نەخوازراوەدایە. وتیشی، خەڵكی كوردستان قوربانیی زۆریان داوە، شایستەی ئەوەنین جارێكیتر وەك قەڵغان بۆ بەدەستهێنانی بەرژەوەندییە حزبییەكان بەكاربهێنرێن و بەهیچ شێوەیەك رێگە بە دووبارەبوونەوەی نادەین.
PUKMEDIA