ئاسایش دەست بەسەر بڕێکی زۆر چەک و تەقەمەنیدا دەگرێت

PUKMEDIA

لۆگۆی ئاسایش

بەڕێوەبەرایەتی ئاسایشی شارەزوور، سێ تۆمەتباری بە بڕی ٤ کیلۆ تیئێنتی و چەندین جۆر چەک و تەقەمەنی بێمۆڵەت و نایاسایی دەستگیرکرد.

لە راگەیەندراوێکی ئاسایشدا کە وێنەیەکی بۆ PUKMEDIA نێردراوە، تێیدا هاتووە: "هێزەکانی ئاسایش دوای ئەنجامدانی لێکۆڵینەوە و بەدەستهاتنی زانیاری، بەبڕیاری دادوەری لێکۆڵینەوەی ئاسایش لە رۆژی ٢٠٢٣/٨/٧، سێ تۆمەتبار بە ناوەکانی (س،م،م – ر،م،ع – ج،ک،ع) کە کاریان قاچاخچێتی کڕین و فرۆشتنی چەک و تەقەمەنی نایاسایی بووە، لە پارێزگای هەڵەبجە دەستگیرکردووە".

لە راگەیەندراوەکەشدا هاتووە: "دوای دەستگیرکردنی تۆمەتباران، بەبڕیاری دادوەری لێکۆڵینەوە پشکنین بۆ ماڵ و دوکانی تۆمەتباران کرا، لەئەنجامدا دەستگیرا بەسەر بڕی ٤ کگم تیئێنتی و ٥٣ پارچە چەکی مامناوەند و چەکی راو و  ١٠ بۆمبی دەستی لەجۆری نارنجۆک و نزیکەی ٢ هەزار فیشەکی جۆراوجۆر و ٤ دوربینی سەرچەک، لەئێستاشدا تۆمەتباران بە ماددەی ١٥ی چەک راگیراون و لێکۆڵینەوە لە دۆسیەکانیان بەردەوامە.
PUKMEDIA