كەمال كەركوكی و دەستبردن بۆ موقەدەس

تایبەت

بیرورا

هەرێم عەبدولقادر
 خۆی ئەسڵی قەباحەت و فەزاحەت و خیانەت هەر لە كەمال و قوتابخانە شكستخواردووەكەی قیادە مۆقەتەوە سەرچاوە دەگرێ و كەسیش ناتوانێ‌ شانی خۆفرۆشی بدات لە شانی كەمال كەركوكی و هاوەڵەكانی، ئەم قەزەمە سیاسیانە كە تەنها بوغز و دڵڕەشی لەناو كایەی سیاسەت بەرهەم دێنن، هیچ رۆژێك بێ درۆ و بوختان و ئاژاوەیەك ناسرەون، دوا كوفری مێژووش لە بەرنامەكەی لەگەڵ (درەو میدیا) گەیشتە ترۆپك، كە وەك خائینێك بە مانگەشەوی شۆڕش  شەهیدان (عەلی عەسكەری و د. خالید سەعید) دەوەڕێت، خۆ ئەگەر بەهاكانی شۆڕش بە پێودانگی جاران مابوایەن، دەبوو لە گۆڕەپانێكی گەورەدا، كەمال كەركوكی وەك خائین و بكوژ بە دادگای گەل حوكمی بەسەردا سەپێنرابا.

شۆڕشی نوێ  كە لە بنەڕەتەوە بۆ ئەوە دروستبوو باری لاری كوردایەتیە شكستخواردووەكەی كەمال  كەركوكی و جەماعەتەكەی راستبكاتەوە و لە یەكەم ساتی شۆڕشەوە، بەعس لە ترسان داڕما، هەردەبوو رژێمی بەعس هاوپەیمانیەتی قیادە مۆقەتە بكات و لەرێگەی كەمال و یاوەرەكانییەوە (عەلی عەسكەری و د. خالید) شەهید بكەن و كارەساتێكی ماڵوێرانكەر بە ئەجێندای هەواڵگری بەسەر پێشمەرگەدا بێنن، ئەو خائینانەی دەستیان لەگەڵ بەعس تێكەڵكرد بۆ كۆمەڵكوژیەكەی هەكاری، ئەوانەی پێشمەرگەی بێ چەك و دیلیان شەهیدكرد، دەبوایە شەرم لە مێژووەكەیان بكەن و زاتی گێڕانەوەی نەكەن، كەچی ئەوەتا كەمال لەوپەڕی بێ مۆڕاڵیەوە جارێك ئەو قارەمانانە بە دۆستی سەدام دەزانێ و جارێكیش ئۆباڵی شەهیدكردنیان دەخاتە ئەستۆی یەكێتی، هەروەك دان بەوەشدا دەنێت كە خۆیان گوللەبارانیان كردوون، ئەمە پێچەوانەی بانگەشەكەی سەرۆك و بەرپرسانی كەمالە، كە لەسەردانیاندا بۆ ماڵی شەهیدی سەركردە عەلی عەسكەری لەبەردەم وێنەكەیدا خۆیان چەماندۆتەوە. كاتێك مێژوو خائین و جەلادەكان دەینوسنەوە و پەرێز چەپەڵەكان لە دیداری تەلەفزیۆنیدا باسی دەكەن، هەر ئەو جۆرە بوختان و دڵڕەشیەیان لێ چاوەڕێ دەكرێت، ئەگەرنا شۆڕش و ئازادیی و كوردایەتیەكەی بەرهەمی خوێنی د. خالید و عەلی عەسكەری ئەوەندە مەزنە، ئەوەتا جێگەی كەمال كەركوكی خائینی تێدا دەبێتەوە، ئەوەندە دیموكراسیە بكوژێك دەبێتە سەرۆكی پەرلەمان، ترسنۆكێك خۆی لێ دەبێتە پاڵەوان، لەكاتێكدا جگە لە كاسەلێسێكی دڵڕەق و پیاوێكی بچووك شتێكی تر نیە.

یەكێتی لەپێناو یەكڕیزی نیشتمانیی و پاراستنی قەوارەی هەرێم، زۆرجار خۆی لە بارگرژی میدیایی و شەڕە دەنوكی سیاسی پاراستووە، بەڵام كاتێك بێ مۆڕاڵی سەركردەیەكی پارتی دەگاتە ئەو ئاستە نزمە، دەبێت یەكێتیەكان و تێكۆشەرانی دێرین راستی روداوەكانی مێژوو و روخساری چەپەڵی كەمال و ئاغاكانی بۆ هەموو دنیا بەیان بكرێت، بۆ یەكێتی مێژووەكەی، شەهیدەكانی، دەستكەوتەكانی موقەدەسن و هەر كەسێك دەست بۆ موقەدەسی كورد و یەكێتیەكان ببات، دەبێت ئەسڵی موقەدەسی وەك خۆی بۆ خەڵك ساغ بكرێتەوە، چونكە لەوە زیاتر قبوڵ ناكرێت باڵی تەخریب و تەشهیری پشت ئەستور بە هەواڵگری لەناو پارتیدا ئەوەندە چەقاوەسوو پەلاماری هەموو كەس بدەن و بۆشیان بچێتە سەر.

PUKMEDIA