قوباد تاڵەبانی: بەجینۆساید ناساندنی كۆمەڵكوژی ئێزدییەكان دادپەروەریی دەچەسپێنێت

PUKMEDIA

ئێزدییەكان

قوباد تاڵەبانی جێگری سەرۆكی ئەنجومەنی وەزیران لە ساڵیادی كۆمەڵكوژی ئێزدییەكاندا پەیامێك بڵاودەكاتەوە و رایدەگەیەنێت: "بە جینۆساید ناساندنی كۆمەڵكوژی ئێزدییەكان هەنگاوێكی گەورەیە بۆ پاراستنیان لە داهاتوودا و هەموو كورد و كۆمەڵگای نێودەوڵەتی و مرۆڤایەتی هاوسۆز و پشتیوانیانە".

دەقی پەیامەكە:


لە نۆیەمین ساڵیادی كۆمەڵكوژی خوشك و برا ئێزدییەكانمان لەلایەن  تیرۆریستانی داعشەوە، یادی تاڵی هەموو قوربانیانی ئەو تاوانە گەورەیە بەرز و پیرۆز رادەگرین. 

ئێزدییەكان لەپێشتریش روبەڕووی كۆمەڵكوژی و ستەمی گەورە بوونەتەوە كە جینۆساید كردنیان بە دەستی داعش دوا وێستگەی ئەو ستەمە گەورەیە بوو، بەڵام ئەوەی جێگای هیوایە، ئەمجارەیان بە تەنها نەمانەوە، بەڵكو هەموو كورد و كۆمەڵگای نێودەوڵەتی و مرۆڤایەتی هاوسۆز و پشتیوانیان بوون. 

یادی نۆ ساڵەی ئەم تاوانە گەورەیە جیاوازتریش بوو، چونكە حكومەتی شانشینی یەكگرتووی بریتانیا چووە ریزی ئەو وڵاتانەی كە بە رەسمی ئەم كۆمەڵكوژییەیان وەك جینۆساید ناساندووە، ئەمەش هەنگاوێكی گەورەیە بۆ چەسپاندنی دادپەروەری و پاراستنی ئێزدییەكان لە داهاتوودا، سوپاسی حكومەتی بەریتانیا و هەموو ئەو وڵاتانەش دەكەم كە ئەم هەنگاوە پێویست و گرنگەیان ناوە. 

قوباد تاڵەبانی 
جێگری سەرۆكی ئەنجومەنی وەزیران

PUKMEDIA