سەرۆك بافڵ: نابێت ژیان و گوزەرانی خەڵك بە ململانێ سیاسییەكانەوە ببەسترێتەوە

نووسینگەی سەرۆكی یەكێتی

بافڵ جەلال تاڵەبانی سەرۆكی یەكێتی و ڤیلی ڤارجولا باڵیۆزی یەكێتیی ئەوروپا لە عیراق

بافڵ جەلال تاڵەبانی، سەرۆكی یەكێتیی نیشتمانیی كوردستان لە بارەگای مەكتەبی سیاسی لە هەولێر پێشوازی لە ڤیلی ڤارجولا، باڵیۆزی یەكێتیی ئەوروپا لە عیراق كرد كە بەبۆنەی كۆتاییهاتنی ئەركەكەی سەردانی هەرێمی كردووە.

‌‎لەدیدارەكەدا سەرۆك بافڵ جەلال تاڵەبانی ستایشی پشتیوانییەكانی ڤیلی ڤارجولا و یەكێتی ئەوروپای لە هەرێم و عیراق كرد كە لە بوارەكانی سیاسی، ئابووری، ئەمنی و مرۆیی رۆڵێكی گرنگیان گێڕاوە و هۆكارێك بوون بۆ بەدیهێنانی سەقامگیری و چارەسەركردنی كێشەكان، هەروەها هیوای سەركەوتنی لە ئەركەكانی داهاتوویدا بۆ خواست.

‌‎لەدرێژەی دیدارەكەدا دۆخی سیاسیی هەرێم و عیراق،  هەوڵەكان بۆ چارەسەركردنی كێشەكان و جێبەجێكردنی یاسای بودجە گفتوگۆی لەبارەوەكرا و گەڕانەوە بۆ دەستوور وەك بنەمای چارەسەركردنی كێشەكان جەختیلێكرایەوە.

‌‎لەبارەی هەوڵەكانی یەكێتی بۆ سەرخستنی پرۆسەی چاكسازی و جێبەجێكردنی بەرنامەی خزمەتگوزاری، سەرۆك بافڵ جەلال تاڵەبانی وتی: "نابێت ژیان و گوزەرانی خەڵكەكەمان بە ململانێ سیاسییەكانەوە ببەسترێتەوە و پابەندبوون بە دابینكردنی شایستەداراییەكان یەكێكە لە ئەركەكانمان. دەشمانەوێت لە هەموو رووەكانەوە هەرێمەكەمان بەرەو ئاوەدانی و سەقامگیری هەنگاوبنێت، بۆ ئەمەش لە هەوڵەكانمان بەردەوامدەبین".

PUKMEDIA