ئەمریکا پێشوازی لە رێککەوتنی یەکێتی و پارتی دەکات

PUKMEDIA

لۆگۆی کونسوڵگەری ئەمریکا لەهەولێر

ویلایەته یەکگرتووەکانی ئه مریکا پێشوازی له رێککەوتنی نێوان یەکێتیی نیشتمانیی کوردستان و پارتی دیموکراتی کوردستان دەکات، لەسەرچەند پرسێکی تایبەت بە هەڵبژاردن و یەکخستنی هێزەکانی پێشمەرگە.

لە تویتێکدا لە تۆڕی کۆمەڵایەتی تویتەر کونسوڵخانەی ئەمریکا لە هەولێر بڵاویکردەوە: کونسوڵخانەی گشتی ئەمریکا لە هەولێر پێشوازی لە رێککەوتنی یەکێتی و پارتی دەکات سەبارەت بە هەڵبژاردنەکانی پەرلەمانی کوردستان و یەکخستن و رێکخستنەوەی هێزەکانی پێشمەرگە.

هەر لە تویتەکەدا کونسوڵخانەی ئەمریکا لە هەولێر راشیگەیاندووە:" ئێمە بە پەرۆشین بۆ بینینی پێشکەوتنی زیاتر لەسەر ئەو بابەتانەی ماونەتەوە لە کۆبوونەوەکانی دواتری نێوان هەردوولا لە بەرژەوەندی خەڵکی کوردستانی عیراقد".

ئەمەش لەکاتێکدایە دوێنێ 30-7-2023، به‌ئاماده‌بوونی بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان له‌سه‌ر ئاستێكی باڵا یه‌كێتی و پارتی له‌ ده‌باشان كۆبوونەوە و له‌پاش كۆبوونه‌وه‌كه‌ش راگه‌یه‌ندراوێكی هاوبه‌شیان بڵاوكرده‌وه‌ كه‌خۆی لەم چەند خاڵەدا دەبینییەوە:

١-هەردوولا پشتیوانی لە ئەنجامدانی هەڵبژاردنی پەرلەمانی کوردستان دەکەین لەو کاتەی لەلایەن سەرۆکی هەرێم دیاریدەکرێت لە دوای راوێژ لەگەڵ لایەنە سیاسییەکانی هەرێمی کوردستان.

٢-بۆ زیاتر خزمەتکردنی خەڵکی کوردستان لە هەموو روویەکەوە کێشە و جیاوازییە بچووکەکان بەلاوە بخرێن و روو لە پێکەوە چارەسەرکردنی کێشەکان بکەین.

٣-بڕیارماندا پرۆسەی رێکخستنەوەی هێزەکانی پێشمەرگە بەردەوام بێت.

٤-هەردوولا بڕیارماندا پشتیوانی لە رێککەوتنەکانی کابینەی نۆیەمی حکومەتی هەرێمی کوردستان بکەین.

٥-لە پێناو زیاتر لێکنزیکبوونەوە و بەرەنگاربوونەوەی ئاڵەنگاری و سەرکەوتن بەسەر کۆسپەکاندا بڕیارماندا بە رۆحیەتی کوردستانیانە و نیشتمانپەروەرانە بەردەوامی بدەین بە کۆبوونەوە دوو قۆڵییەکان و هەماهەنگیمان لەگەڵ سەرجەم لایەنەکان.

PUKMEDIA