سەرۆك بافڵ ئامادەی كۆبوونەوەی یەكێتی و پارتی دەبێت

PUKMEDIA

كۆبوونەوەی وەفدی باڵای یەكێتی و پارتی لە دەباشان

بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان لەسەر ئاستێكی باڵا یەكێتی و پارتی لە دەباشان كۆدەبنەوە.

كەمێك پێش ئێستا وەفدی باڵای مەكتەبی سیاسی پارتی دیموكراتی كوردستان گەیشتە دەباشان بۆ كۆبوونەوە لەگەڵ مەكتەبی سیاسی یەكێتیی نیشتمانیی كوردستان.

پێشتر د. سۆران جەمال تاهیر وتەبێژی یەكێتیی نیشتمانیی كوردستان بە PUKMEDIA ی راگەیاندبوو: "هەردوو مەكتەبی سیاسی یەكێتی و پارتی لە دەباشان لەسەر چەند پرسێكی گرنگ كە درێژەپێدەری كۆبوونەوەكانی رابردووە كۆدەبنەوە".

"پرسی هەڵبژاردنەكانی هەرێم و عیراق و پەیوەندییەكانی نێوان هەردوولا و بارودۆخی هەرێمی كوردستان و عیراق و چەند پرسێكی دیكە تەوەری كۆبوونەوەكەی نێوان مەكتەبی سیاسی یەكێتی و پارتی دەبێت"، وتەبێژی یەكێتی وادەڵێت.

ئەمەش لەكاتێكدایە پێشتریش چەند جارێكی دیكە یەكێتی نیشتمانیی كوردستان و پارتی دیموكراتی كوردستان لەسەر ئاستی مەكتەبی سیاسی كۆبوونەتەوە و كە دواكۆبوونەوەیان رۆژی 9-7-2023، بوو لە پیرمام، پێش كۆبوونەوەكەی پیرمامیش هەردوو مەكتەبی سیاسی یەكێتی و پارتی لە بارەگای مەكتەبی سیاسی یەكێتی رۆژی 25-6-2023، لە هەولێر كۆبوونەوە.

PUKMEDIA