پزیشكانی دانەمەزراو رەخنە لە وەزارەتی تەندروستی دەگرن

ئاژانسەكان

وەزارەتی تەندروستی

پزیشكانی دانەمەزراو لە یاداشتنامەیەكدا داوای راگرتنی ژمارەیەك بڕیاری نایاسایی بەڕێوەبەراتییە تەندروستییەكان و وەزارەتی تەندروستی دەكەن كە دەیانەوێت لە رێگەی خۆبەخشی پلەبەندی پزیشكانی ددان تەواو بكەن دوور لەیاسا و بە پشبەستن بە رێنماییەكی خۆبەخشی و رایدەگەیەنن: "بە گوێرەی  ئەو یاسایە دامەزراندنی پزیشكانی ددان بەشێكە لە تەواوكاری پڕۆسەی خوێندنی پزیشكی بەڵام چەند ساڵێكە وەزارەتی تەندروستی ئەو پڕۆسەی راگرتووە".

دەقی یاداشتەكە:

ئێمە وەك پزیشكانی ددانی دانەمەزراو داوای راگرتنی ئەم بڕیارە نایاساییانەی بەڕێوەبەراتییە تەندروستییەكان و وەزارەتی تەندروستی دەكەین كە دەیانەوێت لە رێگەی خۆبەخشی پلەبەندی پزیشكانی ددان تەواو بكەن دوور لەیاسا و بە پشبەستن بە رێنماییەكی خۆبەخشی .

لە كاتێكدا ئێمە یاسای پلەبەندی پزیشكانمان بە ژمارە 6 ساڵی 2000 هەیە ماددەی 3 یاساكە دامەزراندنی پزیشكان و پزیشكانی ددانی كردووە بە مەرج بۆ تەواوكردنی پڕۆسەی پلەبەندی پزیشكی، بە گوێرەی  ئەو یاسایە دامەزراندنی پزیشكانی ددان بەشێكە لە تەواوكاری پڕۆسەی خوێندنی پزیشكی بەڵام ماوەی زیاتر لە شەش ساڵە وەزارەتی تەندروستی ئەو پڕۆسەی راگرتووە .

دەرهاویشتە نەڕێنییەكانی راگرتنی دامەزراندنی پزیشكانی ددان:

1- نەمانی ئێشكگری لە بنكە تەندروستییەكان نەخۆشخانەكان  بۆ حاڵەتە كتیوپڕەكانی تایبەت بە پزیشكی ددان بۆنمونە ژانی ددان.

2- نەبوونی پزیشكی ددان لە  سەنتەر و بنكە تەندروستییەكان بەتایبەت لە قەزا و ناحیەكان.

3-  درێژی ماوەی نۆرەی پزیشكی ددان لە نەخۆشخانە و بنكە تەندروستییەكان  بۆ زیاتر لە 3 مانگ كە وادەكات هاونیشتیمانی ناچاربێت بچێتە نۆڕینگە تایبەتەكان كە ئەمەش لە توانایی هەموو كەس دانییە.

4-دامەزراندنی پزیشكانی ددان بەگوێرەی یاسایی پلەبەندی خاوەن پیشە پزیشكی و تەندروستییەكانی ساڵی 2000  بەشێكە لە تەواوكاری پڕۆسەی خوێندن و پێگەیاندنی پزیشكی ددان بۆیە ڕاگرتنی ئەو پڕۆسە كاریگەری لەسەر  ئاستی پیشەی پزیشكی ددان دەبێت و هەروەها پزیشكی ددان بێبەشدەكات لە مافی پڕاكتیزەكردنی پیشەی خۆی لە رووی یاساییەوە و پێشكەشكردن بۆ خوێندنی باڵا لە نمونەی ماستەر و بۆرد.

نوێنەرانی پزیشكانی ددانی دانەمەزراو

PUKMEDIA