داوادەکرێت هاوسەنگی بۆ دابەشكردنی پۆستەكانی دیالە بگەڕێنرێتەوە

ئاژانسەکان

پارێزگای دیالە

خۆپیشاندەرانی خەڵکی خانەقین راگەیەنراوێكی ١١ خاڵی سەبارەت بە بارودۆخی پێگەی کورد لە پارێزگای دیالە ئاڕاستەی ڕای گشتی و چەند لایەنێکی پەیوەندیدار دەکەن و تێیدا داوا دەکەن سەرجەم ئەو یاساو بڕگەو ماددانەی کە لەسەردەمی حوکمی ڕژێمی بەعسی رووخاودا دژی کوردانی ئەم ناوچانە دەرکراون هەڵبوەشێتەوە، هاوکات هاوسەنگی بۆ دابەشكردنی پۆستەكانی پارێزگای دیالەدا بگەڕێنرێتەوە.

دەقی راگەیەنراوەکە:

 بەرێزان :-
سەرۆك كۆماری عێراق
سەرۆكی ئەنجوومەنی  وەزیرانی عێراق
فراکسیۆنە کوردستانیەکان و ئەندامانی  ئەنجوومەنی نوێنەرانی عێراق لە پارێزگایی دیالە
سەرۆكی هەرێمی كوردستان
سەرۆک و جێگری سەرۆکی حکومەتی هەرێمی کوردستان
وەزیرانی ناوخۆ و خوێندنی باڵا و پەروەردەی حكومەتی عێراق

پارێزگای دیالە لەڕووی نەتەوە و مەزهەبەوە بەشێوەیەکە ئەکرێت بڵێن عێراقێکی بچووک کراوەیە چونکە هەموو نەتەوە و مەزهەبێکی جیاوازی تێدایە ، لای هەموانیش ڕوون و ئاشکرایە پێکهاتەی  سەرەکی دانیشتیوانی پارێزگایی دیالە لە نەتەوەکانی (( عەرەب و کورد و تورکمان )) و کەمەنەتەوایەتییەکان  پێکهاتووە، خانەقینیش کە سەربە پارێزگای دیالەیە زۆرینەی دانیشتیوانەکەی کوردە و مێژووش شاهیدی برایەتی و پێکەوە ژیانە لەم شارە .

بەڵام بەداخەوە ماوەیەكە بەشێوەیەكی بەرنامە بۆ دارێژراو لەشاری خانەقین و دەوروبەری كار بۆ تێكدانی ئەو ئارامی و پێكەوەژیانە دەكرێت كەلەلایەن سەرجەم هێزو لایەنە سیاسیەكانەوە دەستەبەركراوە، ئێستا كە وڵات بە قۆناغێکی ناسكدا تێدەپەرێت، هەندێك دەستی شاراوە كار بۆ تێكدانی هاوسەنگی و پێکەوە ژیان و ئارامی و شێواندنی مێژوو دەکەن.

دەیانەوێت چارەنووسی میللەتەکەمان لەم سنورە بەرەو تونێلی داخراو ببەن  ،  دەستیان بۆ چەندین بابەتی هەستیار بردووە ، لەنوێترین پێشهاتیشدا بەڕێوبەری پۆلیسی خانەقین لابراوە و كەسێكیتر لەدەرەوەی خانەقین هێنراوەو دەیانەوێت بەزۆر بیسەپێنن، بەمەبەست دەست بۆ بەشێك لەدام و دەزگا حكومیەكان دەبرێت و كوردانی ئەم شارە لە بەڕێوبەرانی فەرمانگە حکومییەکان لادەبرێن و عەرەبی دەرەوەی خانەقینیان  لەشوێندا دادەنێن ، کە بێگومان ئەمەش دەبێتە هۆی نانەوەی کێشە و تێکدانی ئارامی ، بۆ ئەوەی ڕێگری لەم پلان و دووبەرەکیە بگیرێت.

ئێمەی خەڵک و جەماوەری خانەقین لەم خۆپیشاندانە مەدەنیەدا بەتوندی ئیدانەی ئەم دەستێوەردانە نایاسایی و نابەرپرسانە دەكەین، داوا لەهەمووان دەكەین هەڵوێست وەربگرن ، و  پیاداچوونەوە بۆ هەڵوەشاندنەوەی ئەم بڕیارانە بكرێت، بۆ ئەوەی هەمووان پێكەوە وڵات  لەدۆخێكی ئارامدا بپارێزین.

داواكارین دەست بەجێ لایەنە بەرپرسیارەكان ئەم كێشە هەنووكەییانەی خانەقین چارەسەر بكەن کە لە بنەڕەتدا مافی ڕەوا و ئاسایی خەڵکی خانەقینن ، دیارترینیشیان ئەمانەن :

۱- هەڵوەشاندنەوەی سەرجەم ئەو یاساو  بڕگەو مادانەی کە لەسەردەمی حوکمی ڕژێمی بەعسی ڕووخاودا دژی کوردانی ئەم ناوچانە دەرکراون .

۲- داننان بەزانکۆی گەرمیان وەکو زانکۆیەکی باوەڕپێکراو لەلایەن وەزارەتی خوێندنی باڵای عێراقە و هەژمارکردنی بڕوانامەی دەرچووانی ئەم زانکۆیە و دامەزراندنیان لە چوارچێوەی فەرمانگە حکومیەکانی سنورەکە هاوشێوەی زانکۆکانی دیکە بەتایبەتی (۳)یەکەمی بەشەکان کە ماوەیەکە دامەزراندنیان ڕاگیراوە بە بیانووی نابەجێ.

۳-  گەڕانەوەی هاوسەنگی لەدابەشكردنی پۆستەكانی پارێزگایی دیالە و لادانی بەرێوبەری نوێی فەرماندەی پۆلیسی حەوزەی حەمرین و دانانی كوردێك لەشوێنەكەی .
٤- دانانی جێگرێكی كورد بۆ فەرماندەی پۆلیسی دیالە كەمافێكی سەرەكیمانە.

٥ - دانانی كوردێك وەك بەرێوبەری بەشی خوێندنی كوردی لە بەرێوبەرایەتی پەروەردەی گشتی دیالە، كە لەئێستادا کەسێک دانراوە کە نەک کورد نییە بەڵکو کوردیش نازانێت .
٦- فەراهەمكردنی هەلی دامەزراندن بۆ خوێندكارانی دەرچوو لەدام  و دەزگا حكومیەكان.

۷- جێبەجێکردن و دروستکردنی نەخۆشخانەیەکی مۆدێرن لە شاری خانەقین .

٨-دامەزراندنی وێستگەیەکی ئاوی نوێ بۆ خانەقین چونکە کەمی ئاوی پاک لە شارەکە هەڕەشە لە ژیانمان دەکات.

٩- پەیڕەوکردنی هاوسەنگی لە پۆست و پێگە و یەکە ئەمنی و سەربازییەکانی پارێزگاکە بەجۆرێک ڕەنگدانەوی سەرجەم پێکهاتەکانی سنورەکەبێت چونکە لە ئێستادا ڕێژەی کورد لە وەزارەتەکانی بەرگری و ناوخۆ ٢٪ تێپەڕناکات .

۱۰- کردنەوەی فەرمانگەی پێدانی پاسپۆرت لە خانەقین بەو پێیەی هاوسنوری وڵاتی ئێرانە .

۱۱- ڕاگرتنی فەرمانی گواستنەوەی بنکەی دەنگدانی کەسانی دەرەوە بۆ ناو خانەقین لە ڕێگای کۆمسیۆنی هڵبژاردنەکانەوە ، لەهەمانکاتدا ڕێگری بکرێت لە گواستنەوەی موڵک و ماڵی کورد بۆ غەیرە کورد لە ڕێگای جێبەجێکردنی بڕگەکانی ماددەی ۱٤۰ ی دەستوری هەمیشەیی عێراقەوە .

لەکۆتایدا داواکارین هەرچی زووە وەڵامان بدرێتەوە بێن بەهانایی داخوازییەکانمان ، بە پێچەوانەوە هەڵویستی گەورەترمان دەبێت
خۆپیشاندەرانی خەڵکی خانەقین
دووشەممە ٢٤/٧/٢٠٢٣

PUKMEDIA