لەسلێمانی پشتیوانی لە دەنگی ئازاد دەکرێت

PUKMEDIA

رۆژنامەنووس شێروان شێروانی

لەسلێمانی بۆ پشتیوانی رۆژنامەنووس شێروان شێروانی گردبوونەوە ئەنجام دەدرێت، سەرپەرشتیارانی گردبوونەوەکەش ئاماژە بەوەدەکەن:"گردبوونەوەکە بۆ پشتیوانیکردنە لە دەنگی ئازاد و ئەو زوڵمەیە کە لە شێروان شێروانی کرا".

بڕیارە سەعات ٦:٠٠ی ئێوارەی ئەمڕۆ ٢٣-٧-٢٠٢٣ لەبەردەم باخی گشتی لەسلێمانی بەدروشمی ( بەرگریکردن لەشێروان شێروانی و هاوڕێکانی، بەرگرییە لە سبەینێیەکی ئازادتر) بەئامادەبوونی رۆژنامەنووسان و چالاکوانان و رۆشنبیران پشتیوانانی دەنگی ئازاد گردبوونەوەیەکی هێمنانە ئەنجامبدرێت.

بەپێی راگەیەنراوێک کە سەرپەرشتیارانی گردبوونەوەکە بڵاویانکردووەتەوە، ئاماژەیان بەوەداوە:"دژ بەو زوڵم و ناحەقییەی بەبڕیاری دادگای حزب بەناوی یاساوە بەرامبەر بە رۆژنامەنووس شێروان شێروانی و هاوڕێکانی ئەنجامدرا، داوا دەکەین هاووڵاتییان بێنە سەرشەقام و ناڕەزایەتی دەرببڕن.

ئەمەش لەکاتێکدایە، رۆژی ٢٠-٧-٢٠٢٣ دووبارە سزادانەوەی رۆژنامەنووس شێروان شێروانی بۆ ماوەی ٤ ساڵ لەلایەن دادگای هەولێرەوە، کاردانەوە و ناڕەزایی زۆری لێکەوتەوە و دوێنێ-ش لەباخی گشتی شاری رانیە کۆبوونەوەیەکی ناڕەزایی بۆ پشتگیری لە رۆژنامەنووس شێروان شێروانی ، ئەنجامدرا.

PUKMEDIA