ئاسایش گروپێکی چەکداری نایاسایی دەستگیردەکات

PUKMEDIA

لۆگۆی دەزگای ئاسایش

هێزەکانی دەزگای ئاسایشی هەرێم ئەندامانی گروپێکی چەکداری نایاساییان دەستگیرکرد کە ناویان لەخۆیان نابوو فەوجە خۆبەخشەکەی گەرمیان .

لە راگەیەندراوێکی دەزگای ئاسایشدا کە کە وێنەیەکی بۆ سایتی رەسمی یەکێتیی نیشتمانیی کوردستان PUKMEDIA نێردراوە دەڵێت: "لە ئەنجامی هەوڵە بەردەوامەکانی دەزگای ئاسایشی هەرێم لە پێناو زیاتر چەسپاندنی یاسا و رێگریکردن لە هەموو کارێکی نایاسایی و تێکدەرانە و دابینیکردنی ئاسایش و ئارامی، هێزەکانی دەزگای ئاسایش، ئەمڕۆ ٢٠٢٣/٧/١٧، بە فەرمانی دادوەری لێکۆڵینەوە توانیان دوای رووبەڕوبونەوە ئەندامانی گروپە چەکدارە نایاساییەکە دەستگیربکەن کە ببونە هۆی پشێوی و نائارامی لە ناوچەکە و هەستاون بە خۆنمایشکردن و وەرگرتنی سەرانە و هەڕەشەکردن و تەقەکردن و تۆقاندنی هاووڵاتیان".

لە راگەیەندراوەکەی ئاسایشدا هاتووە: "لە کاتی دەستگیرکردنی چەکدارەکان، ڕووبەڕووی هێزەکانی ئاسایش بونەوە، لە ئەنجامدا دوو کارمەندی ئاسایش برینداربوون کە هیوای زوو چاکبونەوەیان بۆ دەخوازین، لە کاتی ڕوبەڕووبونەوەکەدا دوان لە چەکدارەکان برینداربوون و یەک چەکدار گیانی لەدەستدا"، هەروەها "لەئێستادا بە فەرمانی دادوەر بە ماددەی ١٥٦ لەیاسای سزادانی عێراقی ئەندامانی گروپە چەکدارەکە دەستگیرکراون و ڕووبەڕووی یاسا کرانەوە".
PUKMEDIA