پەرلەمانتارێک: یەکێتی پارێزەری مافی هاووڵاتیانی کەرکوکە

PUKMEDIA

ئاڵای کوردستان و لۆگۆی یەکێتیی نیشتمانیی کوردستان

یەكێتیی نیشتمانیی كوردستان بەردەوامە لە هەڵوێستە نەگۆڕەكانی بەرامبەر بە كەركوك و ناوچە دابڕێندراوەكان بە پارێزگاریكردن لە ئاسایش و دانیشتووانەكەی و پێشكەشكردنی خزمەتگوزاری پێیان، ئەندامێكی فراكسیۆنی یەكێتیش لە ئەنجومەنی نوێنەران رایدەگەیەنێت: "پارێزگاری لە موڵك و ماڵی جوتیارانی كورد لەو ناوچانە دەكەین و هەوڵیشمانداوە لەرێگای فەرمانگە حكومییەكانی كەركوك و ناوچەكانی ترەوە خزمەتگوزاری بگەیەنینە گەڕەكە كورد نشینەكان".

د. گەیلان قادر ئەندامی ئەنجومەنی نوێنەرانی عیراق لە فراكسیۆنی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "یەكێتی هەمیشە لە خەمی كەركوك و ناوچە دابڕێندراوەكاندا بووە، هەربۆیە مەكتەبی سیاسی و فراكسیۆن و وەزیرەكانی بەردەوام هەوڵی پارێزگاریكردن لە ئاسایش و هاووڵاتیانی ئەو سنوورە دەدەن، چونكە لەدوای ئەنجامدانی ریفراندۆم و لێكەوتەكانییەوە دەستدرێژی بۆسەر موڵك و ماڵی كورد و جوتیارە كوردەكان لەو ناوچانە زیادی كردووە".

"لەچەند رۆژی رابردوودا ژمارەیەک ئەندامی مەكتەبی سیاسی یەكێتی و  ئەندامانی فراكسیۆنی یەكێتی لە ئەنجومەنی نوێنەران، سەردانی گەڕەكە كورد نشینەكانی كەركوكمان كرد بۆ ئەوەی لە نزیكەوە گوێبیستی داواكاری دانیشتوانەكەی بین، هاوكات هەوڵمانداوە لەرێگای فەرمانگە حكومییەكانی كەركوك و ناوچەكانی ترەوە خزمەتگوزاری بگەیەنینە ئەو گەڕەكانە كە بەدەست  كەمی خزمەتگوزارییەوە دەناڵێنن، ئەمە جگە لەوەی توانیمان لە یاسای بودجەی ئەمساڵدا بەشێك لە بودجەی پارێزگاكان بۆ پڕۆژە خزمەتگوزارییەكان تەرخان بكەین و بەردەوام دەبین لە چاودێری كردنی بودجەی پارێزگاكان و چۆنییەتی دابەشكردنی"، ئەندامەکەی ئەنجومەنی نوێنەرانی عیراق وادەڵێت.
PUKMEDIA