شانازیی یەكێتی مێژووەكەی و ئێستاشییەتی

PUKMEDIA

رێبوار ستار

رێبوار ستار


ئەگەر ئاوڕێك لە مێژووی پڕ لە خەبات و تێكۆشانی یەكێتیی نیشتمانیی كوردستان بدەینەوە، هەر لەسەرەتای دروستبوونییەوە بە رابەرایەتی سەرۆك مام جەلال، مێژوویەكی گەورە و  پڕ لە تێكۆشانە، چونكە دامەزراندنی یەكێتی لە رۆژگارێكی سەخت و دژوار و نائومێدیدا  كە لەدوای نسكۆی 1975، كە هیچ ئومێد و هیوایەك لای خەڵك نەمابوو و تروسكایەك نەبوو خەڵك رێگای خۆی پێ رووناك بكاتەوە بۆ ئاسۆی داهاتووی،  ئا لەوكاتەدا یەكێتی بە هێزێكی پۆڵاین و باوەڕبەخۆبوونێكی مەزنەوە كڵپەی شۆڕشی نوێی هەڵگیرساند و روناكی و هیوای خستەوە دڵ و دەروونی هەموو كۆمەڵانی خەڵكی كوردستان بە گوند و شارەكانیشەوە و بەورەیەكی بەرزەوە خەباتی یەكێتی پەرەی پێدرا و رۆژ بە رۆژیش كڵپەی شۆڕشەكە و خەباتە سیاسییەكە بەهێزتر و گەورەتر بوو تا گەیشتە ئەوەی بۆ نەیاران و دوژمنانی كورد ببێتە مایەی ترس و  دڵەڕاوكێ و بۆ دۆستانیش  بووە مایەی متمانە و بڕوابوونەوە بە بەردەوامیی خەبات.

بە جۆرێك كایەی خەبات پەرەی سەند، هەر ماڵێك لە گوند یان لە شار ئەگەر كوڕێكیان یان كەسێكیان پەیوەندیان نەكردایە بە شۆڕشی نوێ و رێكخستنەكانی یەكێتییەوە  ئەوا ئەو ماڵە خۆیان بە كەمتەرخەم دەزانی و ئەوانەش كە تێكەڵی كاروانەكە ببوون، شانازی گەورەیان بۆ خۆیان تۆمار دەكرد . 

بۆیە یەكێتی لە سەرەتای دروستبوونییەوە هەموو لاپەڕەكانی مێژووی خەباتەكەی پڕە لە داستانی گەورە و  سەروەری و   لەو پێناوەشدا رووبارێك خوێنی رۆڵەكانی بەخشیووە كە بۆ یەكێتی و خانەوادەكانیان بوونەتە سەروەرییەكی گەورە.  

بەری رەنجی ئەو مێژووەی بەهێزەی یەكێتیی نیشتمانیی كوردستانیش، ئەوەیە  كە  سەرەنجام نەخشەی راپەرینی داڕشت و سەریشی خست و ئازادیی هێنایەدی و پەرلەمان و حكومەتی لێ هاتە بەرهەم و لەسایەیدا ئازادی رادەربڕین و  رۆژنامەگەریی و ئاوەدانیی لێ سەوزبوو، لاپەڕەیەكی تری پرشنگداری یەكێتی بەرزكردنەوەی دروشمی مافی چارەی خۆنووسین و چەسپاندنی بوو لە ئەدەبیاتی سیاسیدا و چەسپاندنی سیستمی فیدراڵی بوو لە دەستووری عیراقی نوێدا. 

یەكێتی  تا ئێستاش رۆڵی دیار و بەرچاوی هەیە لە داڕشتنی سیاسەتی كوردستان و عیراقدا و   هێزێكە دەتوانێت هاوسەنگیی رابگرێت و ژمارەیەكی كاریگەرە لە هاوكێشە ناوخۆیی و عیراقی و ناوچەییەكانیشدا.   

یەكێتی قورسایی خۆی تەنها لە خەباتی سیاسی و چەكداریدا چڕنەكڕدۆتەوە، بەڵكو لە خەباتی مەدەنی و دەستەبەركردنی ئازادییەكان و ئیدارە و خزمەتگوزارییەكانیشدا هەمیشە رۆڵی پێشڕەوایەتیی بینیووە. 

هەربۆیە وەك سەرۆك بافڵ جەلال تاڵەبانی دەڵێت: "یەكێتی مێژووە، یەكیتی خوێنی شەهیدە، یەكێتی قوربانیدانە یەكێتی هێزە".

PUKMEDIA