دادگای فیدراڵی چەند ماددەیەكی یاسای بودجەی راگرت

PUKMEDIA

دادگای باڵای فیدراڵی عیراق

دادگای باڵای فیدراڵی عیراق جێبەجێكردنی ژمارەیەك ماددەی یاسای بودجە رادەگرێت، تا ئەو كاتەی سكاڵای تۆماركراو لە دژی دەستوریبوونیان یەكلادەكرێتەوە.

ئەمرۆ دادگای باڵای فیدراڵی فەرمانێكی لایەنداری (وەلائی) بە ژمارە 153 ی  فیدراڵی دەركرد و تیایدا جێبەجێكردنی چەند بڕگە و ماددەیەكی یاسای بودجەی فیدراڵی بۆ ساڵەكانی 2023 و 2024 و 2025 راگرتووە.

ماددەكانیش بریتین لە ئەلف و با لە بڕگەی چوارەمی ماددەی 28 و جیم لە بڕگەی یەكەمی ماددەی 57 و برگەی دووەم لە ماددەی 65 و بڕگەی دووەم لە ماددەی 70 و ماددەكانی 71 و 75 تا ئەو كاتەی تانەی دەستوری تۆماركراو لە دادگای فیدراڵی لەبارەی دەستوریبوونیان یەكلا دەكرێتەوە.

ئەنجومەنی نوێنەرانی عیراق لە رۆژی 12ی حوزەیران یاسای بودجەی پەسەندكرد و لە 26ی حوزەیرانیش لە رۆژنامەی واقائعی بڵاوكرایەوە، حكومەتیش لە رۆژی 3ی تەممووز لە دادگای فیدراڵی سكاڵای دژی ژمارەیەك بڕگە و ماددەی یاسای بودجە تۆماركرد و داوایكرد كاركردن بەو ماددانە رابگرێت.

ئەمەش لە كاتێكدایە پێشتر، سەرۆكوەزیرانی عیراق لەدادگای فیدراڵی سكاڵای لەسەر چەند بڕ‌گە و ماددەیەكی یاسای بودجە تۆمار كردبوو و داوای راگرتنیانی كردبوو، چونكە پێیوابوو دوای پەسەندكردنی یاساكە، هەندێك ماددەی بۆ زیادكراوە، هاوكات دادگای فیدراڵی دەتوانێت بڕ‌یاری راگرتنی ئەو ماددانە بدات، هەروەها دەشتوانێت تانەكانی سەرۆكوەزیران رەتبكاتەوە.

هەرلەوبارەیەوە پێشتر كاروان یاروەیس بڕ‌یاردەری فراكسیۆنی یەكێتی لە ئەنجومەنی نوێنەرانی عیراق لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاندبوو: "محەمەد شیاع سودانی سەرۆكوەزیرانی عیراق لە دادگای فیدراڵی سكاڵای لەسەر چەند بڕ‌گە و ماددەیەك لە یاسای بودجەی عیراق تۆمار كردووەو داوایكردووە تا ئەوكاتەی دادگا بڕ‌یاری كۆتاییان لەبارەوە دەدات جێبەجێكردنیان رابگیرێت".

"سەرۆكوەزیرانی عیراق پێیوایە ئەو كۆپییەی یاسای بودجە كە لە ئەنجومەنی وەزیران پەسەندیان كردووە و رەوانەی ئەنجومەنی نوێنەرانیان كردووە، دەستكاری كراوەو هەندێك ماددەی بۆ زیادكراوە، هەربۆیە داوادەكات لەئێستادا دادگای فیدراڵی كاركردن بەو بڕ‌گە و ماددانە رابگرێت، هاوكات سكاڵاكەی سەرۆكوەزیران مانای ئەوە نییە بودجەی عیراق جبێبەجێنەكرێت، چونكە بودجە پەسندكراوە و هیچ لەو بڕ‌گە و ماددانەش پەیوەندیان بە پشكی هەرێمی كوردستانەوە نییە" كاروان یاروەیس وایوت.

PUKMEDIA