بەڵێ یەکێتی قەوارەو قەبارەی خۆی دەزانێت

PUKMEDIA

رەنج قەرەداغی*

رەنج قەرەداغی*

‎یەکێتی قەوارەو قەبارەی خۆی 
‎دەزانێت، باشترە پارتی بەدوای قەبارەو قورسایی  خۆیدا بگەڕێت!!

‎وەڵامێک بۆ سالار عوسمان و ھەموو 
‎لاسارەکانی دیکەی نێو پارتی

‎لەپاش ھەموو ئەو ئاستەنگ و بەربەستانەی لەپەیوەندییەکانی نێوان یەکێتی و پارتی لەماوەی رابردوو پێشھاتن و سەرەڕای تێگەیشتنی ھەردوولا لەدردۆنگییەکان و ئاگاییان لەوەی ھەرجۆرە لێدوان و پەیامێکی نەخوازراو و نابەرپرسیارانە چەندیتر زیان بەپرسی تەبایی و پەیوەندییەکانیان دەگەیەنێت و چەنیتر ئەو دووھێزە لەیەکتر و رێککەوتن دورئەخاتەوە، ئاشکراشە دوورکەوتنەوەی ئەم دوو ھێزە، یان رونتر بڵێین بەردەوامیدان بەو دۆخەی ئێستا و ناتەبایی و خراپی پەیوەندییەکانیان زیانی زیاتر بەخەڵک و خاکی ھەرێم و قەوارەکەی و ئەزموونی حوکمرانی و پرسی دیموکراسیش دەگەیەنێت، ئەمەی ئاماژەمان بۆ کرد راستییەکی زانراوە لای ھەمووان و بەرلەھەرکەس ئەم دووھێزە درکیان پێکردووە و ئەیزانن.

‎ئەوەی پێویستە لێرە رۆشنایی بخەینەسەر و وەك پرسێکی کوردستانی و پرسیارێکی خەمخۆران و دڵسۆزانی ئەم نیشتمانە بەفۆنتی گەورەو نیشانەی پرسیار و بۆڵد و ئەندەرلاین لەپارتی بپرسین:
‎چما خێرە ھەرکات دەلاقەیەک بۆ لێکتێگەیشتن دروستدەبێت، لاسارێک لەنێو پارتی راستئەبێتەوەو ریسەکە ئەکاتەوە بەخوری؟

‎ئەمە ئەو پرسیارەیە کەدەبوو بەر لەئێمەمانان سەرۆک و سەرکردایەتی پارتی لەخۆی بکات و بۆ ئەو دەست و خواستە بگەڕێت کەبەدوای ناتەبایی و دورکەوتنەوەوەیە، گومان ھەڵناگرێت ئەمە خواستێکی نەخوازراوە و بەر لەئێمە مانان (باش پارتیی)ەکانیش پێی قەڵسن.

‎بۆ ئەو نمونەو ڤێرژنە نوێیەی کۆمیتەی ناوەندی پارتیش کەبەناوی «سالار عوسمان»، باس لەپێگەو قەوارەی یەکێتی ئەکات، پێویستە ئەو داوایە لەپارتی بکات کەبەدوای قەوارەو قەبارەی راستەقینەی خۆیدا بگەڕێت.

‎ یەکێتی ھەورازو نشێوەکانی ژیانی حیزبی خۆی بەبەرچاوی خەڵک و نیشتمانەوە گوزەراندوە و لەگەڵ واقعی ژیانی حیزبی قۆناغەکەدا مامەڵە ئەکات و لەھەوڵی تێپەڕاندنی ئاستەنگەکانیشدایەو خودی سەرۆک و سەرکردایەتیەکەشی لەزیاتر لەبۆنەیەکدا داوای لێبووردنیان لەخەڵککردووە کەحوکمرانی ئەم ھەرێمە لەئاستی داخوازییەکانی خەڵکدانەبووە، ئەو حوکمرانییەی کەزیاتر لەیەکێتی زۆر زیاتریش پارتی لێی بەرپرسیارە.

‎ھەربۆیە باشترە ئەو کاك «سالار عوسمان»ە، داوا لەپارتیەکەی خۆی بکات لەھەڵبژاردنی داھاتوودا، بەلیستێکی دەنگدەرانی راستەقینەو بێ کۆچکردوان و بێ بیانی و بێ ساختەکاری بەدوای قەوارەو قەبارەی خۆیاندا بگەڕێن و لێگەڕێن یەکێتی و لایەنەکانی دیکە خۆیان لەخەمی دەرد و پەیداکردنی دەرمانی خۆیاندابن.

‎ھەروەك بەرچاورونییەك بۆ ھەر لاسارێک کەبەبۆنەو بێبۆنە پەلاماردانی یەکێتیان وەك ئەرک پێسپێردراوە، باشترە بزانن واقعی سیاسی کوردستان پێمان ئەڵێت:
‎ دۆخی خراپی حوکمرانی و ئەدای ناتەندروستی خزمەتگوزاری لە سی ساڵی رابردوودا وایکردوە داکشانی جەماوەری بۆ تەواوی حیزبەکانی ئەم ھەرێمە دروسبکات.
‎بەم پێوەرەش پارتی ئەگەر تەنھا یەک ھەڵبژاردن، لێگەڕێت بەیاسایەکی ھاوچەرخ و لیستێکی پاکی بێمردو و بێ بیانی و بێ ساختەکاری بەڕێوەبچێ قەبارەو قورسایی خۆی دەبینێت و دەزانێت چ بونەوەرێکی لەڕولاوازی لێدەرچووەو ھیچ ھێزێکیش ھێندەی پارتی بەر رقی دیموکراسی جەماوەر و تۆڵەی حوکمرانی ناتەندروست و چەوت ناکەوێت.

*ئەندامی مەکتەبی رێکخراوە دیموکراتیەکان

PUKMEDIA