قوباد تاڵەبانی و نەسروڵڵا رەشنودی: كارئاسانی بازرگانی هەرێم و ئێران بكرێت

نووسینگەی قوباد تاڵەبانی

قوباد تاڵەبانی و نەسروڵڵا رەشنودی

قوباد تاڵەبانی، جێگری سەرۆكوەزیران لەگەڵ نەسروڵڵا رەشنودی كونسوڵی گشتی ئێران لە هەرێمی كوردستان كۆبوویەوە و پێكەوە باسی دواپێشهاتە سیاسییەكان  و پەیوەندییەكانی نێوان هەردوولایان كرد و جەختیشان كردەوە لەسەر پەرەپێدانی زیاتری پەیوەندییە بازرگانییەكان لە داهاتوودا.

لە كۆبوونەوەیەكدا كە رۆژی 6-7-2023،  لە هەولێر بەڕێوەچوو، هەردوولا هاوڕابوون لەسەر پەرەپێدانی پەیوەندییە بازرگانییەكان و ئاڵوگۆڕی بیروڕایان كرد لەسەر چۆنییەتی رێكخستنەوەی دەروازە سنوورییەكان بە جۆرێك كە لە بەرژەوەندی بازرگانانی هەردوولادا بێت.

لەمبارەیەوە هەردوولا هاوڕابوون كە هەماهەنگی زیاتربێت لەنێوان هەردوو حكومەت بۆ كارئاسانیكردن بۆ بازرگانان و ئەمەش لە بەرژەوەندیی ئابوری هەردوو وڵاتدایە.

لەبەشێكی تری كۆبوونەوەكەدا باس لە وەبەرهێنانی كۆمپانیا ئێرانییەكان كرا لە هەرێمی كوردستان، لەمبارەیەوە جێگری سەرۆكوەزیران رایگەیاند: "حكومەتی هەرێمی كوردستان پێشوازی لە وەبەرهێنەرانی ئێرانی دەكات و كۆمپانیا ئێرانییەكان دەكرێت زیاتر رۆڵیان هەبێت لە گەشەپێدانی هەرێمی كوردستان و كارئاسانی پێویستیشیان بۆ دەكرێت".

PUKMEDIA