د. رێواز: هیچ نوسراوێكم بۆ دادگای فیدراڵی نەناردووە

PUKMEDIA

د.رێواز فایەق

د. رێواز فایەق سەرۆكی‌ خولی‌ پێنجەمی‌ پەرلەمانی‌ كوردستان رایگەیاند: "لە چوار ساڵی رابردوودا، جگە لە نوسراوی راسپاردنی پارێزەران بۆ نوێنەرایەتیكردنی پەرلەمان لەبەردەم دادگاكە‌ هیچ نووسراوێكم ئاڕاستەی‌ دادگای‌ فیدڕاڵی‌ نەكردووە" .

لەراگەیەندراوێكدا كە وێنەیەكی بۆ سایتی رەسمی یەكێتیی نیشتمانیی كوردستان PUKMEDIA نێردراوە، د. رێواز  دەڵێت: "ئەو چوار ساڵەی‌ كە لە پۆستی سەرۆكی پەرلەماندا بووم، هیچ نوسراوێكم ئاڕاستەی‌ دادگای‌ فیدڕاڵی‌ نەكردووە جگە لە راسپاردنی پارێزەران، هەر داوایەكیش لەسەر پەرلەمان كرابێت، سەرۆكی پەرلەمان تەنها بە سیفەتی وەزیفەكەی داوالەسەركراو بووە نەك بە سیفەتی كەسی".‌

 د.رێواز فایەق رایدەگەیەنێت: "وەك سەرۆكی پەرلەمانی كوردستان، دادگای فیدراڵی هیچ پرسیارێكی سەبارەت بە د.یوسف ئاڕاستە نەكردووم‌، چونكە داواكان لە سەر پەرلەمان بوون نەك لەسەر كەسی سەرۆكی‌ پەرلەمان، پارێزەرانیش وەڵامی هەر پرسیارێكیان لە چوارچێوەی كاری پیشەییاندا دابێتەوە، چ بە زارەكی و چ بە لائیحەی داوا، گوزارشت نییە لە ڕای كەسیی سەرۆكی پەرلەمان" . هەروەك سەبارەت بە رێگری‌ لە د.یوسف محەمەد سادق دەڵێت: " ئەوكات و ئێستاش باوەڕی نەگۆڕم ‌ئەوەیە كە ئەوەی بەرامبەر د.یوسف كرا نایاسایی و ناسیاسی و بگرە ستەمێكی‌ گەورە بوو لە پڕۆسەی‌ دیموكراسی‌ و ژیانی‌ پەرلەمانی‌ كرا".

PUKMEDIA