​واده‌یه‌كی دیكه‌ بۆ هه‌ڵبژاردنی هه‌رێم دیاریی ده‌كرێت

سەرۆکایەتی هەرێم

کۆبوونەوەی سەرۆکی هەرێم لەگەڵ کۆمسیۆنی باڵای سەربەخۆی هەڵبژاردنی عیراق

سه‌رۆكی هه‌رێمی كوردستان له‌گه‌ڵ كۆمسیۆنی باڵای سه‌ربه‌خۆی هه‌ڵبژاردنی عیراق كۆبووه‌وه‌ به‌مه‌به‌ستی دیاریكردنی واده‌یه‌ك بۆ ئه‌نجامدانی هه‌ڵبژاردن.
 
ئه‌مڕ‌ۆ پێنجشه‌ممه‌ 15/6/2023 نێچیرڤان بارزانی سه‌رۆكی هه‌رێمی كوردستان، له‌گه‌ڵ كۆمسیۆنی باڵای سه‌ربه‌خۆی هه‌ڵبژاردنی عیراق كۆبووه‌وه‌ كه‌ له‌سه‌ر بانگهێشتی سه‌رۆكی هه‌رێم بۆ گفتوگۆكردن و هه‌نگاوه‌كانی ئاماده‌كاریی هه‌ڵبژاردنی داهاتووی په‌رله‌مانی كوردستان، سه‌ردانی هه‌ولێریان كردبوو.

له‌كۆبوونه‌وه‌كه‌دا كه‌ خاتوو جینین پلاسخارت نوێنه‌ری تایبه‌تیی سكرتێری گشتیی نه‌ته‌وه‌ یه‌كگرتووه‌كان له‌ عیراق، جێگرانی سه‌رۆكی هه‌رێمی كوردستان، تیمێكی پسپۆڕ‌ی یۆنامی و سه‌رۆك و ئه‌ندامانی ئه‌نجومه‌نی كۆمیسیارانی عیراق ئاماده‌یبوون،  نێچیرڤان بارزانی دووپاتی كرده‌وه‌ كه‌ هه‌رچی زووه‌ هه‌نگاو بنرێت بۆ ئه‌نجامدانی هه‌ڵبژاردنی هه‌رێمی كوردستان و ئاماده‌ییی سه‌رۆكایه‌تیی هه‌رێم و حكومه‌ت و سه‌رجه‌م لایه‌نه‌ په‌یوه‌ندیداره‌كانی هه‌رێمی كوردستانی بۆ سه‌رخستنی پرۆسه‌كه‌ ده‌ربڕ‌ی.

لای خۆشییه‌وه‌ خاتوو جینین پلاسخارت و تیمی یۆنامی پشتیوانیی خۆیان بۆ هه‌نگاوه‌كانی نێچیرڤان بارزانی ڕ‌اگه‌یاندو ئاماده‌یییان نیشاندا بۆ پێشكه‌شكردنی هاوكاری بۆ ئه‌نجامدان و سه‌رخستنی هه‌ڵبژاردن.

دواتر سه‌رۆكی كۆمسیۆنی باڵای سه‌ربه‌خۆی هه‌ڵبژاردنی عیراق و ئه‌نجومه‌نی كۆمیسیاران، ئاماده‌ییان نیشاندا به‌پێی یاسا و دوای ده‌سته‌به‌ركردنی پێداویستییه‌كان و ڕ‌ێككه‌وتن له‌سه‌ر كاتێكی گونجاو، هه‌ڵبژاردنی هه‌رێمی كوردستان به‌ڕێوه‌ ببه‌ن، له‌مباره‌یه‌وه‌ بڕ‌یاردرا له‌په‌یوه‌ندیی به‌رده‌وامدا بن به‌مه‌به‌ستی دیاریكردنی واده‌یه‌ك بۆ ئه‌نجامدانی هه‌ڵبژاردن.

PUKMEDIA